E economista y calificador di riesgo bancario, Leonardo Buniak, a señala siman pasa cu “a perde mas di 6 miyon di tonelada di producto agricola den ultimo simannan pa falta di combustible,” dunando impresion di seriedad di e situacion.

Buniak, den e programa “Día A Día”, conduci pa e periodista Cesar Miguel Rondon, a manifesta cu e realidad “ta cu Venezuela tin mester urgentemente di restructura su debe publico externo. Venezuela tin cu paga den e proximo 10 aña US$91.000 miyon na debe publico y nos ta den default caba desde 2017.”

Tambe el a indica cu “nos tin falta di gasolin den henter Venezuela y no ta permiti sector priva haci importacion,” segun e publicacion Banca y Negocios. Buniak a relata cu ta produciendo un poco menos cu 400.000 bari pa dia: “Cu un produccion asina abao, ainda nan ta mandando bari pa Cuba. Tin un retorica politico envez di un voluntad real di percura pa cosnan ta funciona.”

El a señala cu si presidente di Merca, Joe Biden, dicidi flexibiliza algun cos pa motibo humanitario, “mi ta kere cu por rescata e convenio di intercambio di petroleo pa diesel”. Tambe el a compara economia Venezolano cu otro pais: “ Economia di Venezuela ya ta mas chikito cu di Guatemala, Costa Rica, Republica Dominicana y Ecuador.”

E economista a resalta encuanto e tema di vacuna contra Covid-19 cu “tin un serie di restriccion di caracter politico pa no trece nan di exterior”. “Awor ta propone pa haci un intercambio di vacuna pa petroleo. E curva di contagio di Venezuela tabata protegi pa un bon rato pa e isolacion cu nos tabatin na 2020,” el a añadi. “Ya e virus no ta importa mas, e ta den Venezuela y e situacion ta sumamente critico.”

 

LEAVE A REPLY

Please enter your comment!
Please enter your name here