(LaPatilla/Bloomberg) – Aunke cu na februari, e persona encarga cu e petroleo di e regimen di Nicolas Maduro, Tarek el Aissami a haci e promesa cu e aña aki Pdvsa lo logra aumenta su produccion di petroleo na 1.5 miyon bari pa dia pa medio di un ‘plan di bombeo’.

Expertonan petrolero ta alega cu e meta ey lo no ta posibel di alcansa door di e destruccion grandi cu e industria petrolero ta aden, y pa falta di inversion despues di a keda exclui di e credito internacional pa falta di cumplimento di pagonan di e debe, e falta di dollar na e pais y e sancionnan economico poni door di Merca for di 2018. Segun Ivan Freites, secretario di profesionalnan y tecniconan di Fuotv, e pais ta produciendo solamente 570 mil bari di petroleo pa dia, un cifra cu gobierno no ta publica for di april 2020.

Actualmente, e mayoria di e depositonan di petroleo ta registra un nivel di deterioracion halto pasobra no a inyecta nan cu e gas natural necesario pa mantene e presion. Asina e economista Jose Toro Hardy, ex-director di Pdvsa a informa.

E ta sigura cu estudionan ariba Pdvsa ta indica cu e estatal ta rekeri entre inversion y gastonan, un cantidad di 25 biyon dollar pa aña cu e estado Venezolano no tin, y pa un periodo di 8 pa 10 aña pa por logra recupera e produccion cu e pais tabatin ora cu e difunto presidente Hugo Chavez a yega na poder.

“Ora cu e regimen bisa cu nan lo aumenta e produccion na 1.5 miyon bari pa dia, e ta bisando un barbaridad. E momentonan cu Venezuela mas hisa e produccion den un aña tabata di aña 1995 pa 1998, den e epoca ey e la logra hisa su produccion na 180 mil bari pa dia pa un aña”, e la splica.

LEAVE A REPLY

Please enter your comment!
Please enter your name here