Un impresionante multitud a reuni diasabra pasa na Caracas, a pesar cu tur via di acceso tabata militarisa pa impedi entrada di hende na e puno di encuentro na Chacaito. Den su discurso dilanti e multitud, presidente interino Juan Guaido a ripiti su formula pa yega na un solucion pa e pais: termina cu e usurpacion, gobierno di transicion y eleccion liber.

Si e marcha, e prome di un serie di acto di protesta contra e dictadura apoya pa gremionan di empleado publico y movimento estudiantil, tabata pa midi si ainda oposicion ta conta cu apoyo, a logra esey en todo caso. Sin embargo, esey no ta implica cu tin optimismo pa logra desaparicion di e regimen di Nicolas Maduro, cu ta conta cu apoyo ainda di forsanan arma. En todo caso no tabatin enfrentamento arma ni hopi violencia di banda di e cuerponan uniforma. Foro Penal a informa di 14 aresto durante e marcha.

Di otro banda, presidente de facto Nicolas Maduro a revela ayera cu representante di su regimen, lidera pa Jorge Rodriguez, a biaha pa Noruega pa bolbe na mesa di dialogo cu presidente interino Juan Guaido.

“Jorge Rodriguez a reuni cu gobierno di Noruega. Nan ta sigui estableciendo contacto. E siman aki oposicion ‘Guadosista’ a biaha pa Europa y a reuni cu representantenan di Oslo,” Maduro a bisa durante un entrevista cu Jose Vicente Rangel na Televen.

Tambe el a conta cu presuntamente parti di e comision ey a acepta pa bay un proceso electoral parlamentario tal manera constitucion ta prescribi, na 2020. “Mayoria di e sector Guaidosista ya a bisa nos cu nan ta bay eleccion parlamentario.”

 

LEAVE A REPLY

Please enter your comment!
Please enter your name here