(ElNacional) – Ocho Venezolano morto y cuater ta den estado di gravedad pa e candela devastador cu a tuma luga dialuna ultimo anochi na un centro di detencion migratorio na e ciudad Mexicano, Ciudad Juarez.
Den total, e cifra di fayecidonan pa e hecho aki ta ubica na 38, cu ta inclui Hondureño-, Guatemalteco-, Salvadoreño- y Colombianonan.
Un lista difundi pa e autoridadnan di e gobierno di Andres Manuel Lopez Obrador ta señala cu entre e ciudadanonan di Venezuela tin un persona sin identifica cu no a sobrevivi e candela.
Tur e heridonan ta interna na e Hospital de la Familia Femap, na Ciudad Juarez. E mayoria di e migrantenan Venezolanonan tabatin y tin edadnan di entre 20 y 30 aña di edad.
Lopez Obrador, den principio, a responsabilisa diamars ultimo e stranheronan pa cende algun corchon na candela durante un protesta rechasando nan deportacion. Poco despues a difundi un video ariba rednan social di e camaranan di seguridad di e centro.
Por observa cu e funcionarionan encarga di e custodia no a purba di habri e portanan pa saca e migrantenan, cu tabata cera, y a cambio, a sali for di e sitio a pesar cu e candela tabata crece y e huma tabata expande cu intensidad.
Fiscalia General di Mexico a confirma diaranson cu e personal encarga cu e centro no a haci nada pa evacua e migrantenan, door di cual e autoridadnan ta investigando ocho persona pa presunto homicidio.
“Ningun di e sirbidonan publico ni di e polisnan di seguridad priva a realisa algun accion pa habri e porta na e migrantenan cu tabata paden ya caba cu e candela,” Sara Irene Herrerias, titular di Fiscalia Specialisa den Derechonan Humano, a bisa.
E presunto responsabelnan ta señala un migrante pa cuminsa e candela. A pidi cuater orden di captura y e sospechosonan ta dunando nan declaracion, e fiscal a señala.
