Organisacion di Estadonan Americano (OEA) ayera a aproba un resolucion rechasando e eleccion parlamentario realisa den weekend na Venezuela, organisa pa e chavismo, boycottea pa oposicion y rechasa pa Merca, Union Europeo y varios pais di America Latino.

Brasil a presenta e proyecto, y desde inicio a conta con sosten di Canada, Chile, Colombia, Ecuador, Merca, Guatemala, Paraguay, Perú, Uruguay y Venezuela, cu ta representa den e foro regional pa un delegado di oposicion. Mexico a vota contra y Argentina a abstene.

E texto ta expresa un ‘rechaso na e eleccion fraudulento di dia 6 di december ultimo, conduci pa regimen ilegitimo di Nicolas Maduro cu e proposito evidente di elimina e unico institucion legitimo y democratico electo na Venezuela’.

E resolucion ta expresa cu eleccion no tabata ‘liber ni husto conforme e condicionnan estableci den derecho internacional’, den un contexto unda no a libera e presonan politico y tin un ‘falta di independencia di autoridad electoral’.

E paisnan cu ta sostene e resolucion a expresa cu ‘e conformacion di un entidad no electo democraticamente ta profundisa e proceso di destruccion di democracia y estado di derecho na Venezuela’.

Durante e debate virtual cu a cuminsa pa 11am Washington, e resolucion tabatin mester di e voto di 18 di e 34 pais cu ta compone e foro regional, y a logra 21 positivo, dos contra, cinco abstencion y seis ausencia. E regimen di Maduro a retira di OEA na april 2019, y awo e luga di e pais ta ocupa pa Gustavo Tarre, nombra pa Asamblea Nacional.

Den e eleccion, e ganado tabata e aliansa di partidonan cu ta apoya Maduro, ken su regimen no ta reconoci pa mas di 50 pais, entre nan Merca. Oposicion – cu te awo tabata conta cu mayoria den Asamblea Nacional – a haci un yamado pa abstencion y solamente tabatin participacion di 30% di e padron electoral, esun mas abao den ultimo 15 aña.

Como respuesta na e eleccionnan aki, Juan Guaido, hefe di parlamento eligi na 2016 y ken lo ta den su funcion te januari 2021, ta inpulsa un referendum online rechasando e comicionan di diadomingo.
Guaido ta reconoci como presidente interino pa mita centenar di pais, debi na e iregularidad den eleccion den cual Maduro a asumi su segundo mandato.