Venezuela: Saime a elimina e carta di residencia como rekisito pa solicita cedula y paspoort

(ElNacional) – Gustavo Vizcaino, director general di e Servicio Administrativo de Identificación, Migracion y Extranjeria (Saime), a informa dialuna cu e carta di residencia ya no ta un rekisito mas pa solicita cedula y paspoort.

Den un entrevista pa e programa Al Instante di Union Radio, Vizcaino a aclara cu inclui e rekisito aki pa solicita documentonan di identidad tabata un eror, locual kiermen cu e ciudadanonan mester acudi e dia di nan cita solamente cu e formulario cu e sistema ta duna.

“Mi por informa na henter nos pueblo cu e carta di residencia no ta bay ta un rekisito pa tramita paspoort of cedula, esey a wordo elimina for di nos sistema. Bo mester presenta solamente e formulario di e cita,” el a anuncia.

Tocante e actualisacionnan riba e plataforma di Saime realisa siman pasa, Vizcaino a sigura cu ta trata di un sistema cu ta facilita e ingreso na e website, como un gestion automatico di e cedula di identidad.

“E ta un proceso simpel. Bo ta ingresa cu bo cedula di identidad y un pin cu Saime ta duna cu cual bo mester ingresa. Inmediatamente bo ta drenta e portal y haci loke e sistema ta bisa bo,” el a señala.

Ariba rednan social un gran cantidad di usuarionan a reporta fayonan y inconveniencianan pa drenta e sistema di Saime. El Nacional a purba drenta e website dialuna, pero no tabata posibel.

Pa loke ta e kehonan tocante con dificil e ta pa personanan cu no ta maneha tecnologia bon pa realisa e tramitenan, Vizcaino a bisa cu nan por pidi asistencia di un funcionario di Saime.

“Bo por busca e asistencia di un primo, bisiña of bo ruman, semper cu e haci e tramite necesario den e caminda di honestidad. Si e persona no tin niun hende cu por yud’e, e por acudi na e oficina y pidi e asistencia di un funcionario di Saime,” el a manifesta.

El a sigura cu semper nan a pidi informacion tocante e registro y e luga di nacemento di e ciudadanonan. Mientras cu e rekisitonan nobo di aspecto fisico, el a afirma, ta sirbi pa identifica e persona den casonan criminalistico of den un tragedia.

E director di Saime a bisa cu nan a adkiri mashinnan nobo di print pa print 50 mil paspoort pa dia. “Es decir nos no ta bay tin mas e rij di print di documentonan di identidad,” el a subraya.