Regimen di Nicolas Maduro a aumenta salario minimo na 250.000 bolivar, como 3,71 dollar segun e tasa di cambio oficial vigente, den un economia cu tin dos aña den un hiperinflacion cu ta destrui balor di e moneda local. IMF a proyecta inflacion pa 2019 na 200.000%.

Entrada minimo, e total di salario minimo y e bono di alimentacion obligatorio, a pasa di 300.000 pa 450.000 bolivar, equivalente na 6,7 dollar segun cambio oficial. Ta trata di e prome reahuste di 2020, despues di tres aumento decreta pa e mandatario socialista na 2019 y seis na 2018, sin por recupera e poder di compra di e Venezolanonan, cu ta sufriendo un di e casonan mas grave di hiperinflacion den historia mundial.

Den e ultimo aumento na october 2019, entrada minimo mensual a keda na alrededor di 15 dollar, cu actualmente a keda reduci na menos di mita di e suma ey.

E situacion a conduci na un dolarisacion informal, cu e poblacion tratando di protege nan entrada cu divisa contra hiperinflacion y e perdida di balor di e bolivar. E entrada total nobo ta alcansa pa cumpra cuatro kilo di carni.

Nicolas Maduro ta culpa e bateria di sancion di Estadonan Uni pa e crisis grave, incluyendo e embargo petrolero, unda normalmente exportacion ta percura pa 96% di entrada total di Venezuela.

Oposicion ta atribui e desastre inflacionario na gasto publico exagera y emision di bolivar cu no tin cobertura real den produccion di e pais, y na e corupcion durante e bonanza petrolero di Venezuela (2004-2014).

LEAVE A REPLY

Please enter your comment!
Please enter your name here