(LaPatilla/Efe) – Sociedad Interamericano di Prensa (SIP) a afirma ayera diamars cu, den e ultimo seis luna na Venezuela, persecucion y menasanan contra periodistanan cu ta investiga casonan di corupcion, ta constante di parti di alto funcionarionan di e regimen di Nicolas Maduro.
SIP a indica den su rapport provisional, cu mester wordo aproba den e reunion di mita di aña cu a cuminsa ayera, cu nan a agrega tambe casonan di violencia fisico, menasa y atakenan contra periodistanan cu tabata cubri e eleccionnan regional y local den luna di november aña pasa, di parti di autoridadnan policial y militar, “gruponan paramilitar arma y organisa pa e gobierno”.
“E confiscacion di instalacionnan di El Nacional a pasa cu e falta di respet di un sistema hudicial cu no tin autonomia di e Poder Ehecutivo. E huesnan ta sigui instruccionnan directo di Diosdado Cabello, pasando ariba di cualkier procedemento legal”, e organisacion a afirma.
Otro agresion registra pa SIP tabata e blokeo sin respaldo hudicial, di manera opcional y absolutamente arbitrario di portalnan di medionan manera El Nacional, La Patilla y Efecto Cocuyo.
Diasabra cu a pasa e director ehecutivo di SIP, Ricardo Trotti, a sigura na Efe cu e panorama di libertad di prensa na Latino America a bira pio cu casonan agudo di represion di periodismo independiente y violencia contra e periodistanan.
“Den e ultimo seis lunanan aki e situacion di libertad di prensa na e region a bira mas grave cu un serie di caracter dominante den e añanan recien manera ta e violencia contra e medionan y e asesinato y detencion di periodistanan”, Trotti a denuncia.
