Un simulacro electoral, programa como ensayo pa e comicio legislativo di dia 6 di december proximo, a cuminsa ayera na Venezuela cu e mashinnan di votacion nobo como principal novedad, y a pesar di e denuncia cu mayoria di oposicion ta considera e proceso como un ‘fraude’.
Presidente di Conseho Nacional Electoral di e regimen (CNE), Indira Alfonzo a invita e ciudadanonan pa ‘participa den e evento aki diseña cu hopi compromiso, disciplina y trayectorio”, el a bisa periodistanan.
Tin 381 centro di votacion total instala na henter e pais cu lo ta habri te cu 3pm ora local. Di esakinan, 55 lo sirbi como ‘centro piloto’ for di cual lo revisa e transmision di datonan di e mashin di votacion cu a keda diseña pa e proceso electoral aki.
Alfonzo a cu esaki ta e di 25 eleccion den ultimo 20 aña, di cual cinco tabata parlamentario. P’esey el a subraya cu Venezuela tin ‘un tradicion historico, democratico di ehercicio liber y soberano’ cu por demostra. Igualmente el a destaca cu nan ta conta cu un ‘sistema automatisa’ cu ‘desde su fase preelectoral, ta totalmente audita’.
Sinembargo, mayoria di oposicion Venezolano ta considera e eleccion aki como un fraude, ya cu rectornan di CNE a ser nombra pa Tribunal Supremo di Husticia (TSJ) y no pa Asamblea Nacional (AN – Parlamento) di mayoria opositor.
Alabes ta rechasa TSJ, cual su miembronan a mustra nan simpatia cu chavismo y a keda scogi den proceso ‘express’.
Ademas, TSJ a interveni den varios partido principal, cambiando su liderazgo, cual a keda transferi – bao orden di TSJ – na ex-militante cu a keda expulsa y acusa di corupto pa nan ex-compañeronan.
Asina cu e logo, nomber y colornan di e organisacionnan opositor principal si lo aparece riba papeleta electoral, pero no bao liderazgo di e politiconan cu ta encabesa nan.
