(ElNacional) – Venezuela a acumula un inflacion di 86.7% den e prome cuater lunanan di 2023, e Banco Central di Venezuela (BCV) a informa diabierna ultimo, despues di mey aña sin publica cifranan di e indicador aki, cu a slow down den e ultimo lunanan.
Segun e data oficial, e aumento promedio di prijsnan di bienes y servicio durante luna di april tabata di 3.8%, na maart di 6.1%, na februari di 19.3% y na januari di 42.1%, e inflacion mensual mas halto cu a keda registra na e pais den ultimo dos añanan.
Mientras tanto, e aumento di prijsnan den luna di december a yega un 35.3% y na november 12.6%.
E entidad a señala cu na luna di april, e grupo cu a registra e inflacion mas halto tabata e servicio di vivienda (cu excepcion di e servicio di telefon), cu un aumento di 21.4%; comunicacion, cu un aumento di 20.5%; ekiponan di hogar, cu un aumento di 7.1%; y salud, cu un aumento di 5.2%.
Di otro banda e sector di alimento y bebida no alcoholico a aumenta 2.3% luna pasa.
Economistanan ta splica cu un di e causanan di e aceleracion di e inflacion durante e ultimo lunanan di 2022 y den luna di januari di e aña aki tabata relaciona cu e aumento di e prijs di dollar. Loke tin un impacto directo den e mayoria di bienes y servicio, calcula den e moneda Mericano.
Venezuela a sali den luna di december di 2021 di un hiperinflacion den cual el a drenta aden den 2017 y cu, den e lapso aki, a reduci e balor di e bolivar, e moneda oficial, como tambe e confiansa di e ciudadanonan den dje, door di cual nan a adopta di manera no oficial e dollar den un intento pa proteha nan ingreso.
