Sur di Venezuela ta un teritorio sin ley. O mas bien, loke ta reina ta un tipo di ley di “wowo pa wowo, diente pa diente” cu e asina yama sindicatonan di oro, gruponan delincuente cu a podera di control di e minanan di oro na varios lugar den estado Bolivar, Amazonas y Delta Amacuro, ta aplica.
Human Rights Watch a revela ayera den un informe e nivel di violencia cu e afan pa haya oro ta origina, pa cual a bin Venezolanonan di tur parti di e pais en busca di subsistencia den e minanan y unda tambe regimen di Nicolas Maduro ta busca beneficio cu ya nan no ta haya mas cu exportacion di petroleo.
E informe ta contene testimonio di algun di e 21 personanan cu e organisacion a entrevista na fin di aña pasa y cu a traha den minanan cerca di Las Claritas, El Callao, El Dorado y El Algarrobo den ultimo dos aña; como tambe otro 15 entrevista cu lidernan indigena, activista y periodista cu a traha den e zona.
Entre e relatonan tin esun di un muhe cu a mira con, ora nan a acusa un homber di a horta un carson, nan a corta su mannan cu machete. Otro homber cu a traha como minero a relata cu un dia, mientras nan tabata come, nan a corta man di un compañero cu supuestamente a horta un telefon. Nan a bay cu e supuesto ladron y no a tende nada mas di e persona. Un luna despues e mesun testigo a mira con nan a gara un muhe cu supuestamente a horta 10 gram di oro di otro trahador, nan a mar’e na un mata y a corta su cabes cu un chainsaw, dilanti tur hende.
Otro homber a conta cu un miembro di un sindicato a obliga un mucha homber di 17 aña, acusa di horta oro, pone su mannan hunto manera ta reza e ta reza y a pone siete tiro directo riba su mannan.
