Victorioso! – Bon Dia Aruba dunando hoben un plataforma

Mi nomber ta Efraim Jr. Odor. Otronan conoce mi manera Junior, Juni y mi nomber artistico Ephrayim. Mi ta un rapper/musico, poeta, escritor y actualmente mi a cuminsa traha na Bon Dia Aruba. Mi ta un persona hopi spiritual, y pa mi e no tabata straño cu despues cu mi a cumpli mi 25 aña di edad, mi a bira haya un oportunidad pa traha cu Bon Dia Aruba net riba nan 25 aña di aniversario. Mi a wordo puntra si mi lo kier traha un cancion y video pa contribui na e aniversario di Bon Dia Aruba. Na prome instante mi a pensa cu porta e no lo ta un bon idea pa motibo cu ami no tin ‘filter’’

Pero despues di a papia un rato cu hefe y coleganan, mi a dicidi di toch ‘ban pe’. Pasobra mi lo haya poco libertad di creatividad y tambe paso e lo ta algo unico cu e corant nunca a yega di haci. Pues, mi a pensa dicon no trece un tiki ‘style’, anto haci algo poco mas moderno.

Victorioso
E cancion ‘Victorioso’ ta refleha con fuerte y stabiel bo por ta despues cu bo bringa tur obstaculonan di bida y sigui pusha pa logra bo metanan.
E coro ta bisa:

“Bida aki bao ta peligroso, ser cauteloso y hacie grandioso.”
Cu esaki mi kier refleha cu bida na tera no ta facil: e ta peligroso y nos mester tene cuenta con nos ta biba y pone den nos mente pa haci nos bida grandioso. E motibo pakico mi a scoge esaki ta pasobra mi ta haya cu el a fit cu e tremendo trabao cu Bon Dia Aruba ta haciendo pa basta tempo caba cu sigur no tabata facil. Tambe personalmente con ami mes a evoluciona manera un persona.

Mi a bishita un otro artista local cu yama Curley Jr. pa yuda mi produci e instrumental pa ‘Victorioso’.

”Mi a tum’e manera un honor pa traha algo pa Bon Dia. Mi a concentra riba traha algo moderno toch cu un toke di old school y mi a keda hopi contento cu e resultado”, Curley Jr. ta bisa.  Curley Jr. ta un productor di musica local, musico/rapper y escritor.

Trahamento di video

E director hoben di e video “Victorioso’, Tristan J. Nedd, ta conta cu actualmente mayoria di hende gusta mira video: “Mi kier gradici Bon Dia pa por a ofrece mi e oportunidad pa yuda traha e video. Mi ta haya esaki ta un bon manera tambe pa atrae lesadonan cu porta no ta worry mucho cu noticia, y fuera di esaki, e ta un bunita gesto y algo unico pa haci manera prensa.”

Tristan J.Nedd a studia cinematografia na New York Film Academy y a yega di gana Aruba International Film Festival 2 biaha tras di otro. Actualmente den cooperacion cu un grupo di hoben cu ta artisticamente y mentalmente riba e mesun nivel, a dicidi di bini hunto y lanta un compania di produccion cu yama Novum Indie Studios cual tur cos ta den proceso pa haci esaki un realidad.

Mi tabata tin e placer pa traha cu e conocido riba rednan social Gilmher Croes kende a hunga mi hefe den e video ‘Victorioso’. El a gusta e idea anto tabata hopi contento di a forma parti den e proyecto aki. Nos tin mas proyecto cu nos ta bay traha cu ne y mi mester bisa, e guy aki tin enorme talento pa actuacion cual mi ta sigur e lo bay hopi leu.

Mi mama

Den e coro mi ta menciona:
“Mama semper di: Mi hijo sea juicioso!”

Mi mama ta di Republica Dominicana y mi ta sigur cu hopi paisanan di Sandon por compronde kico esaki kemen. E palabra ‘juicioso’ kemen un persona cu sa con pa haci bon decisionnan. Of den otro palabra: un persona cu mester por husga bon y semper analisa locual e haci pa su mesun bon.
Sea respetabel, sea honesto y balente pa semper bay dilanti den bida.

Esaki ta un di e miho lesnan cu mi a siña for di mi mama. Pa locual awendia mi ta hopi gradici na dje.