(DutchNews.nl) – Autoridad di proteccion di data Hulandes, DPA a impone un multa di 750mil euro riba compania di rednan social TikTok pa viola e privacidad di mucha chikito.

E agencia a bisa cu a dicidi di multa e compania popular Chines pasobra e informacion cu TikTok a duna usuarionan Hulandes – hopi di ken ta mucha – na momento di instala y usa e app tabata na Ingles, y pa e motibo aki, no tabata facil pa compronde.

“Door di no ofrece nan declaracion di privacidad den Hulandes, TikTok a faya di duna un splicacion adecua di con e app ta colecta, procesa y usa datonan personal”, DPA a bisa. “Esaki ta un violacion di legislacion di privacidad, cu ta basa riba e principio cu hende mester semper ricibi un idea claro di kico ta siendo haci cu nan datonan personal.”

DPA a lansa su investigacion riba TikTok aña pasa. Desde e tempo ey, e compania a establece operacionnan formal na Irlanda, y esaki ta nifica cu DPA ta transferiendo algun di e resultadonan di su investigacion na e Comision di Proteccion di Data Irlandes pa mas accion.

TikTok si a implementa un cantidad di cambio pa haci su app mas safe pa muchanan bao edad di 16 aña, aña pasa, despues cu DPA a informa e compania di su hallazgonan. Sinembargo, un problema cu a keda tabata cu muchanan ainda por pretende di ta mas grandi door di yena un edad diferente na momento di crea nan cuenta. Door di haci esaki, nan ta pone nan mes den mayor peliger, DPA a bisa.

TikTok a entrega un obhecion na e multa.

TikTok tambe ta enfrentando dos demanda colectivo na Hulanda. Asociacion di consumidor, Consumentenbond y e fundacion Take Back Your Privacy ta exigiendo pa e compania paga tur mucha Hulandes cu ta usa e plataforma dañonan di alrededor di mil euro, pa ilegalmente colecta y comparti nan informacion priva.

Den un otro caso, fundacion Hulandes SOMI a bisa cu ta demandando e plataforma propiedad Chines pa faya di protege e seguridad di muchanan rond di Europa, y pa viola reglanan di aviso y privacidad Europeo. Alrededor di 64mil mayor a registra demandanan cu un fundacion non-profit di informacion di mercado pa un suma combina di 1.4 biyon euro.

 

 

LEAVE A REPLY

Please enter your comment!
Please enter your name here