Vocero di departamento di Impuesto, Meverly Romano: Declaracion di impuesto manda via e-mail no a bay bon

Clientenan di departamento di Impuesto ta keha cu awor cu e departamento aki a digitalisa gran parti di nan servicio, nan tin cu entrega declaracion di inkomstenbelasting y winstbelasting personal, y no digital cu ta e forma mas ideal aworaki debi na e pandemia.

Di otro banda, considerando e situacion di Covid, tin cierto temor cu hendenan ta bay aglomera pa entrega ambos declaracion di impuesto, vooral durante fin di november y cuminsamento di december cu ta e deadline pa entrega nan.

E aña aki departamento di Impuesto a saca alrededor di 44 mil formulario di inkomstenbelasting. Normalmente no tur ta drenta mesun hunto, ya cu nan ta haya un 70% pa 80% bek. E resto ta drenta despues cu tempo. E ta un cantidad considerabel, y nan ta premira cu ora e fecha final ta yegando, lo bira un poco mas druk.

Post box y cita

Vocero di e departamento aki, Sra. Meverly Romano a declara na Bon Dia Aruba cu nan ta consciente di e situacion aki. Te hasta nan tabata aceptando ambos declaracion via e-mail of via un sistema otro cu nan tabatin. Pero esun via e-mail no ta bayendo bon debi cu e declaracion di inkomstenbelasting y winstbelasting ta un documento grandi, y ta presenta problema pa manda nan.

Inkomstenbelasting y winstbelasting tin hopi pagina, alrededor di 20 pagina. Ora cu e cliente na scanner tur e attachment y anexonan cu tin di bin acerca, e ta bira un file hopi grandi. “E no ta pasa via e-mail,” Romano a bisa. Ta asina cu nan sistema cu ta filter tur e-mail ta want’e. Romano a splica cu ora e cliente ta kere cu nan departamento a ricibi nan e-mail cu e documentonan, ta resulta cu e no ta pasa.

Ya caba nan a haya varios caso di e mesun indole, caminda e cliente ta argumenta cu el a manda su declaracionnan, pero ta resulta cu departamento di belasting no a ricibi e. E di dos situacion ta cu ora e cliente ta mand’e via e-mail, e no ta haya un comprobante cu el a wordo entrega. Romano a bisa cu esaki a conduci nan departamento a dicidi cu nan ta permiti e clientenan entrega e documentonan den nan sede mes.

Entrega

Segun Romano, aworaki e miho manera cu nan a introduci ta esun cu nan cliente ta deposita nan declaracion den nan post box. Nan ta pone hunto cu e documento original, un copia di e prome pagina pa asina e clientenan por haya despues nan comprobante.

Nan oficina di administracion ta registra e declaracion ora cu e ta drenta, y tambe nan ta pone stempel riba dje riba ki dia el a drenta. Tambe nan ta stempel e copia di e prome pagina pa e cliente y nan ta mand’e pe via post. “Asina ey e cliente ta haya su comprobante toch…” el a bisa.

Mientras pa e clientenan cu kier entrega tres of menos declaracion nan por hacie na receptie di oficina di impuesto na Cumana. Nan ta wordo atendi mesora, caminda nan ta controla e documentonan entrega, y despues nan ta stempel e copia di biaha locual ta keda como un comprobante pe. Pa e clientenan cu tin mas cu tres aangifte pa entrega, nan mester haci un cita pa asina den un camber separa nan ta atende e clientenan aki. Igualmente e cliente por haci cita pa entregamento di un formulario so.

Romano a declara cu e mesun procedura ta conta pa winstbelasting. Nan ta atendiendo tur dos pasobra winstbelasting ta alrededor di 9 mil formulario cu nan a saca. Un cantidad grandi a drenta na mei y nan ta premira cu pa fin di november e ta bira druk tambe.

E fecha final pa winstbelasting ta 30 di november y e fecha final di inkomstenbelasting ta 2 di december. Ambos ta casi cay den e mesun temporada. P’esey departamento di Impuesto ta premira cu pa e temporada aki, e lo bay bira druk. “Pero nos ta cla pa esey,” Romano a bisa.

Fluho di cliente

Encuanto e fluho di cliente, Romano a laga sa cu pa medio di cita nan ta controlando e fluho di clientenan mas tanto posibel y e ta bayendo bon.

Te aworaki den practica, nan ta premira si, cu ora e fecha final ta yegando lo bira un poco mas druk. Pero e ta sugeri pa esnan cu tine cla pa nan entreg’e di awor caba y nan ta haya nan comprobante mesora. Djis nan mester bin cu un copia cu nan ta stempel como un comprobante pa e cliente.

“E ta bayendo bon te aworaki nan. Nos tin menos reclamo cu ora e declaracion a wordo manera via e-mail debi ya sea nos no a ricibie of tambe cu nan no ta haya comprobante,” el a bisa.

Formulario laat

Tin persona cu ta informa cu nan no a haya nan respectivo formulario. E ta haya cu posiblemente Post Aruba ainda ta haciendo entrega di nan. Te ainda belasting no a haya informacion si nan a termina di parti nan.

Pero si acaso un persona a cambia di adres of pa cualkier otro motibo e no a ricibi su formulario di declaracion, e por haci un peticion cerca e departamento en cuestion pa e por haya un duplicado.

E departamento aki ta cuminsa duna duplicado entrante 15 di october pa duna espacio pa Post Aruba por caba di entrega e formularionan di impuesto. E cliente por probecha e tempo aki pa compila tur documento exigi pa anexa nan hunto cu su declaracion, manera documento di banco y tambe esun di nan doño di trabao.

Control di DVG

Encuanto e situacion di Covid y presencia di nan clientenan den nan sede, Romano a bisa cu nan ta trahando den colaboracion estrecho cu DVG cu regularmente ta controla nan salanan. Asina kico cu lo por tin, DVG ta bin cu su recomendacion riba kico departamento di belasting mester adapta pa asina e ambiente por keda uno safe.

El a bisa cu e clientenan cu aworaki a yega di entrega nan declaracion personalmente ta bay satisfecho, ya cu nan ta wordo atendi hopi rapido. Loke DVG no kier ta pa e persona keda pega den e balie di receptie pa largo tempo. P’esey nan a limita entregamento di declaracion na receptie te cu tres declaracion. Si e cliente tin mas, e mester haci un cita pa e wordo atendi den un camber separa.

Un biaha mas, vocero di e departamento aki, Sra. Meverly Romano a haci un apelacion na nan cliente pa preferibel haci un cita pasobra eventualmente e cliente ta sinti su mes mas sigur. Nan ta wordo atendi den un espacio separa, unda e cliente ta su so hunto cu e funcionario di impuesto. Tambe e ta considera importante pa nan clientenan no keda sin entrega nan declaracionnan di impuesto.