E vuelo TUI OR 383 cu tabata bula for di Amsterdam riba diasabra direccion Bonaire y Aruba, mester a haci un aterisahe di emergencia na Irlanda pa motibo di un emergencia medico.
Segun informacion di noticiero online, aruba.nu, un mucha abordo di e avion a sufri un atake epileptico, pa cual tabata necesario hospitalisacion. E avion a aterisa na Shannon, Irlanda, unda a saca e mucha for di e avion.
Pa motibo di descanso obligatorio pa e tripulacion, continua cu e vuelo no tabata un opcion. E Dreamliner cu 300 pasahero abordo mester a bolbe na Amsterdam pa e motibo aki. E aeropuerto a regla pa nan un estadia durante anochi, igual cu pa e pasaheronan di Aruba y Bonaire cu mester a bula na Amsterdam.
Ayera e vuelo a bolbe sali for di Amsterdam pa 4:20pm ora di Hulanda. E avion aki a yega Aruba pa 8.40pm ora di Aruba, y despues a continua su transito na Bonaire. For di eynan, e avion a sali pa 10pm pa bolbe Amsterdam.
E vuelo regular entre Amsterdam, Bonaire y Aruba a continua segun schedule.
Potret di BES-reporter.
