28juli, NP, Wally (1).jpg

Bon Dia Aruba a tene un entrevista cu hungado di baseball Arubano Wally Vrolijk kende recientemente a sali den medio di comunicacion pa motibo cu el a wordo suspendi despues cu test a sali positivo pa e substancia methylhexaneamine. Sr. Vrolijk a splica Bon Dia Aruba locual cu a sosode.

“Locual a pasa ta cu januari mi a cuminsa bebe un pre work out nobo cu a sali y mi tabata bay hopi bon cun’e. Den mi rutina semper mi ta cumpra un pre workout y proteina pa mantene mi energia y calorianan cu mi ta kima, cosnan di deporte. Januari mi a bay Santo Domingo cu mi team y mi a test y tur cos a sali bon y mi tabata bebiendo esey caba. Mi a biaha bek pa bay hunga den e temporada di baseball mes, anto algun luna despues nan a bin haci test (Major League) y segun mi ta hungando e temporada tabata bayendo hopi bon mes danki na Dios. Sinembargo, a bin constata cu un siman atras oficina di Major League Baseball a yama mi pa bisa mi cu mi a sali den prueba positivo. E ora mi a bisa nan dicon y con por ta y pa ki substancia. E ora nan a bisa mi Methylhexaneamine. Mi a puntra nan di kico esaki ta bin pasobra mi no ta inyecta mi mes cu nada.  Nan a puntra mi si mi ta asmatico  y mi a bisa nan cu no, nan a puntra si mi a haya griep y si mi a bebe algo, y mi a bisa nan cu mi a haya griep pero mi a bebe locual cu team a duna mi pa bebe. E ora nan a bisa mi cu mi tin 3 dia pa apela mi caso, pero cu mi a sali positivo y mi por pasa oficina e siguiente dia pa papia. “

Pre workout ta contene methylhexaneamine
Sr. Vrolijk a sigui splica cu su trainer a sinta cun’e pa wak kico por a causa cu e test a sali positivo y el a bise pa bin cu tur producto cu e ta bebiendo di energia y proteina etc. E ora nos a haya riba e pre work out cu tin e mesun nomber pa cual mi a sali positivo na dje. “E ora mi a dal den clabo, pasobra mi a wak cu ta esey. Esey a haci cu mi no kier a apela mas pasobra mi sa cu ta e producto ey y mi tabata consciente cu mi no por pleita mi caso pasobra Major League tin un regla cu ignorancia no ta un excuus.” Sr. Vrolijk a enfatisa cu e ta compronde e regla ey y pues ta acepta y asumi e responsabilidad. 

E siguiente dia el a bay oficina di Major League Baseball y a hiba locual cu a causa e test positivo pa e substancia methylhexaneamine. Nan a splica cu ta djis un substancia cu nan a prohibi varios luna atras anto esaki ta dura 24 ora den bo curpa. Pues si bo a bebe 2 dia atras y a haci un test, e lo no a sali positivo. E ora mi a bisa nan cu e ta algo kens asina chikito y mi ta bay wordo suspendi pa 50 wega, a pesar cu ta mira con bon mi temporada ta bayendo. Pero nan no por haci nada pasobra ta regla y mi mester a asumi responsabilidad pa tur locual a pasa. Siguientemente el a sinta cu su team, hefenan, manager y coach etc. Y su manager a bisa cu e ta haya hopi lamentabel locual cu a pasa y su compañero di camber y team tambe. “Pasobra nan ta compronde y nan sa di mi trabou y con serio mi ta den locual cu mi ta haci. Nan a bisa pa otro biaha mi tin hopi mas cuidou cu locual cu mi ta bebe y duna e trainer check e prome cu mi uza algo nobo y cu awo mester asumi e suspension y pa sigui train pa otro temporada. Mi agente y hefe cu a firma mi pa Orioles Baltimore mes, a yama mi y a duna mi tur su voto di confiansa y a bisa mi cu tur cos ta ok cun’e y cu team ta para tras di mi y cu nan sa cu mi no a haci algo consciente.” E team cu Sr. Vrolijk ta hungando cun’e aworaki ta Baltimore Orioles y esaki ta e prome aña cu nan. Anteriormente e tabata hungando cu LA Dodgers. Sr. Vrolijk ta un hoben di 21 aña.

Efecto suspension 50 wega
Pa loke ta e suspension, 33 wega ya a cuminsa conta di e 50 nan cu e tin suspendi. Esey kiermen cu pa e proximo temporada otro aña e lo mester warda 17 wega na comienso pa completa e 50. E comienso di e proximo temporada ta April y 17 wega ta mas o menos 2 siman y algun dia. Pa loke ta e suspension e no mag di tin uniform bisti riba veld, e no mag di train cu team, y no mag t’ey basicamente, te ora e suspension pasa. A pesar di esaki e lo sigui train y lo haci esaki cu  compañeronan di diferente team cu ta Rubiano y tin custumber di train hunto.  

Finalmente el a bisa: “Mi ta haya hopi di lamenta locual cu a pasa, e ta un record cu ningun pelotero lo gusta tin den su nomber, pero mi tin mi cabes na halto y mi a sali for di e team cu cabes na halto. Mi mester tin mas cuidou otro biaha, mi sa mi talento y mi team y hefenan sa esey. Y mi ta kere esaki lo no stroba mi y ta djis un motivacion pa mi sigui traha mas duro y pa mi yega unda cu mi tin cu yega y semper saca nomber di Aruba dilanti.”

LEAVE A REPLY

Please enter your comment!
Please enter your name here