web.jpg

Miembro di Parlamento Endy Croes a informa cu diabierna ultimo, nan a haya un presentacion di e compania di utilidad WEB N.V. Durante e presentacion aki nan a haya sa cu e preocupacion vocifera riba falta di financiamento pa atende cu e pago di nan compromiso relaciona proyectonan cu ta tumando luga, a wordo resolvi caba.

Encuanto e problema di financiamento, recientemente un grupo miembro di asociacion di staf profesional y experto di e compania a denuncia e falta di financiamento pa WEB por atende su compromiso na inicio di 2020. Un situacion cu tabata pone na peliger e desaroyo di e proyectonan importante pa garantisa nan servicio. Croes a declara na Bon Dia Aruba cu e parti aki tambe a wordo menciona den e presentacion, ya cu tabatin preocupacion riba e parti di financiamento, ya cu na januari awor mester haci pagonan substancial pa cu e proyectonan aki. “Nos a compronde cu nan a sali afo caba,” el a bisa.

E parlamentario a agrega cu e situacion aki a haya claridad. El a bisa cu berdaderamente WEB a splica parlamento cu nan a resolve e parti di financiamento cu nan tabata preocupa cune. Nan no a bay den profundidad con e financiamento aki a wordo logra. Mas bien nan a bay den profundidad riba materia tecnologico. El a cualifica e presentacion aki como un ‘bunita presentacion,’ caminda WEB a presenta su vision pa futuro.

Menos fuel oil.
Den nan presentacion WEB N.V. a referi na diferente proyecto pa garantisa e produccion di awa y coriente na Aruba. Nan a papia di inversionnan grandi cu lo wordo traduci den beneficio pa comunidad y pa nos medio ambiente, asina Croes a bisa. Pa comunidad e prijs cu e cliente mester paga pa e servicio aki lo bira menos. Croes ta kere cu pronto, kisas na inicio di 2020, gobierno lo bay anuncia cu e tarifanan di WEB lo wordo ahusta cu rebaho pa nos comunidad. Tur esaki ta depende si nada grandi lo sosode.

Pero tambe pa 2020 nos lo haci menos uzo di fuel oil of azeta HFO, sino cu WEB su planta lo switch pa uzo di gas cu lo beneficia nos medio ambiente. E parlamentario a bisa cu pa 2022 lo bira real cu WEB lo baha su uzo di fuel oil cu 67%. Kiermen nan ta pasa di 6 mil bari cu WEB tabata uza na fuel na 2005 y pa aña 2022 e cantidad aki lo baha alrededor di 2 mil bario of por ta menos.

LEAVE A REPLY

Please enter your comment!
Please enter your name here