Despues di un luna di a anuncia cu lo hisa e tarifa, awor ta confirma cu prijs di coriente ta subi cu un averahe di casi 24 porciento pa tur categoria y tarifa di awa tambe ta aumenta. WEB ta den cora y no por absorba mas e gasto di combustible, despues cu a pasa den tur su reserva financiero pa cubri e aumento di gasto, esaki, a pesar cu a tuma otro medidanan interno pa reduci mas gasto posibel.

WEB, ELMAR y Utilities Aruba ayera a bini hunto pa anuncia e aumentonan, aunke cu e enfoke tabata mas riba e situacion di e companianan y e motibo pakico mester ahusta of aumenta e tarifanan.

E aumento di awa pa e categoria di uso mas abao ta menos cu a anuncia pa Juli. Luna pasa, WEB a anuncia cu ta bay usa dos categoria di calculacion di tarifa. Minister, pa medio di Utilities Aruba a wanta e aumento y awor a mantene e categorianan, unda tur ta mira un aumento cu un grado mas halto segun cu ta gasta mas. E diferencia pa awa ta cu e categoria di uso di cero pa tres meter cubico y di cuater pa seis meter cubico conoce e mesun aumento cu ta 1.75 florin pa meter cubico. Pues entrante Augustus, e prijs pa e categoria mas abao ta 6.30 florin pa meter cubico en bes di 4.55.

Directornan di Utilities Aruba, WEB y ELMAR, respectivamente Sr. Anthony Rojer, Sr. Alfredo Koolman y Sr. Anthony Irausquin, hunto cu relacionista publico di e companianan Asja Dongen di WEB y Audrey Croes di ELMAR a duna un presentacion conhunto di e situacion cu mester a conduci na aumento di tarifa, pero tambe cu enfasis unda por yuda comunidad consumi menos awa y coriente y asina mitiga e efectonan di e aumento.

Director di Utilities Aruba NV Sr. Rojer a bisa cu e efectonan di e pandemia y despues e guera na Ucrania a crea un impacto enorme pa e gasto di combustible. “Prijsnan di petroleo a cuminza fluctua aña pasa y nos mester a mantene nos prijsnan pa comunidad di Aruba, pero alabes haci ehercicionan hunto cu Gobierno pa mantene e balansa, con pa tene e prijsnan mas accesibel pa comunidad.” Segun Rojer, e momento ey mester a mira e balans social y e interes di WEB y ELMAR. Mester a mantene e companianan sano pero tambe pa e prijsnan pa awa y coriente ta keda pagabel. “E criteria cu Gobierno a aplica ta pa un tarifa cu ta mas social posibel.”

Despues di varios reunion entre e partidonan, a yega asina leu pa determina e tarifanan nobo pa awa y coriente.

WEB

Director di WEB, Alfredo Koolman, ir a duna un ilustracion di e aumento di e combustible. “E aumento di prijs di azeta ta considerable, mas di 126 porciento.” Koolman a bisa cu inicialmente a mira con pa modera e gasto. A ‘freeze’ aumento di salario di personal, cu a contribui na un reduccion di gasto na balor di 6 miyon florin.

“Tambe nos a dicidi pa absorba e gasto di aumento di gasto di combustible pa siete luna, cu ta nifica cu nos ta bay tin un entrada mucho mas abao.” No solamente e entradanan di WEB a baha, e compania a haci uso di tur su reservanan y awor a yega na un punto critico cu esey no ta posibel mas. WEB ta den cora. “Y despues di hopi deliberacion cu stakeholders, nos a yega na e parti di ahuste di tarifanan.”

Ademas di absorba e gastonan di WEB, e ahuste ta necesario pa garantisa e stabilidad financiero di WEB Aruba NV y asina garantisa e suministro di awa y coriente pa Aruba, Koolman a splica.

Limita dependencia riba HFO

Ya ta pa algun tempo caba cu WEB ta traha pa limita su dependencia riba HFO, esta heavy fuel oil. Desde 2005 a reduci e uso di HFO di 6000 pa 4000 bari pa dia. Cu uso di e RECIP 4 cu a drenta den funcion na Juni ultimo, WEB ta mira un reduccion adicional di 1000 bari pa dia. “Nos ta na mas o menos na 3000 bari pa dia di uso di HFO.” E obhetivo ta pa sigui corta den dependencia di HFO, y e proyecto di LNG lo contribui na esaki, mescos cu e proyecto di expansion di coriente pa medio di turbinanan di biento, cu ta den preparacion. Ta trata di un plan pa pone otro parke di turbina di biento, e biaha aki na Rincon, cerca di Vader Piet, cu mester produci un capacidad di 45 pa 50 megawatt adicional di coriente.

“Nos lo tin nos proyectonan duradero cu biento, solo y bateria. Na 2024 lo yega na un suministro di energia renobabel di 35 porciento, cu ta nifica un reduccion di dependencia di HFO pa un total di 65 porciento y na 2030 nos ta mira cu e parti di energia duradero lo ta na 50 porciento, pues asina ta keda disminui e dependencia riba HFO,” Koolman a bisa.

Ta trahando riba e plannan duradero hunto cu Utilities Aruba y ELMAR, los di e expansion di energia di biento, pa medio di ‘repowering,’ pa yega 100 megawatt di coriente procedente di energia alternativo. Segun Koolman, e proceso aki ta urgente ya cu kier elimina e dependencia di HFO. “Energia solar tambe ta un alternativa y e obhetivo ta pa aumenta e capacidad solar cu 10 pa 15 megawatt.” WEB tambe ta buscando forma pa inverti den e capacidad di almacena energia alternativo, pa medio di baterianan cu por wanta e coriente ora cu no ta haci uso di dje. Aki ta papia di un capacidad di 10 megawatt.

Mientrastanto WEB y ELMAR a publica e ‘bracketnan’ cu e tarifanan nobo cu ta cuminza core pa Augustus. Mientras cu WEB a adapta e prijsnan segun ‘bracket,’ ELMAR di otro banda a hisa e prijs cu e mesun porcentahe.

Bon Dia Aruba lo amplia riba splicacion di tanto WEB como ELMAR riba e retonan y tambe esfuersonan pa yuda educa comunidad con pa anda mas consciente cu awa y coriente, pa asina por mitiga e gasto di aumento aki.