Weganan Interesante di Softball Escolar durante fin di siman

ORANJESTAD – Diabierna atardi tabata tin continuacion di torneo di softball escolar na tereno di Rockets na Santa Cruz.For di trempan caba por a mira cu pa e weganan aki tabata tin mas fanatico cu a bin apoya nan scolnan.

Ceque College Mavo vs Mon Plaisir College:

Prome wega di atardi a tuma luga entre Ceque College Mavo y Mon Plaisir College.

E wega aki a cuminsa caminda ambos ekipo a bataya fuerte pa logra bay cu e victoria, den cabes di prome inning Ceque College Mavo ta anota 2 careda pa tuma bentaha den e wega aki, pero den bom di prome inning, Mon Plaisir College no ta keda atras y ta anota 3 careda.

Den cabes di dos inning, Ceque College Mavo no ta logra anota careda, mientras cu den bom di dos inning, Mon Plaisir College ta anota 1 careda mas.

Den cabes di tres inning, Ceque College Mavo ta logra anota 1 careda, mientras cu den bom di tres inning Mon Plaisir College ta anota 2 careda mas.

Den cabes di cuater inning, Ceque College Mavo ta rally y ta anota un total di 4 careda pa asina tuma bentaha den e wega aki cu score di 7-6, pero den bom di cuater inning Mon Plaisir College tambe a rally pa anota 5 careda y tuma e bentaha bek cu score di 11-7.

Den cabes di cinco inning, Ceque College Mavo no a logra anota careda y asina tambe e wega a termina cu victoria pa Mon Plaisir College Mavo.

Mon Plaisir College Mavo a anota 11 careda, a bati un total di 11 hit, mientras cu Ceque College Mavo a anota 7 careda, a bati un total di 6 hit.

Maria College Mavo vs EPB San Nicolas
Di dos y ultimo wega di atardi a tuma luga entre Maria College Mavo y EPB San Nicolas.

Den cabes di prome inning, ekipo di Maria College Mavo ta anota 1 careda, y den bom di prome inning EPB San Nicolas ta anota 3 careda, pa tuma bentaha cu score di 3-1.

Den bom di 3 inning EPB San Nicolas ta logra anota 1 careda mas pa asina haci e wega 4-1 y asina aki tambe e wega a termina cu score di 4-1 pa EPB San Nicolas.

EPB San Nicolas a anota 4 careda, a bati 9 hit , mientras cu Maria College Mavo a anota 1 careda y a bati un total di 5 hit.

Weganan ta continua e siman aki na tereno di Rockets na Santa Cruz, IBiSA ta haci invitacion na tur mayor, alumno y fanatico di softball pa bin apoya nan scol den e torneo aki.