Mientras Paisnan rond mundo ta ehecutando nan plan di recuperacion economico enfoca riba fortifica nan capital humano, mehora poder di compra, stimula actividad economico mediante incentiva fiscal y inversion publico. Aruba ta carece di un perspectiva pa un recuperacion economico.

Gobierno di Aruba no a prepara un lista di actividad economico cu lo wordo explora pa asina contribui na recuperacion economico di nos Pais. Locual tin pendiente pa nos Pais ta un lista di medida cu a wordo anuncia caba y cu lo wordo anuncia cu consencuencia doloroso pa comunidad den su totalidad.

E ayudo financiero brinda pa Gobierno di Aruba lo conoce su fin 1 di December 2021. E pregunta cardinal ta cu dicon net awor despues di un proceso electoral ta anuncia e finalisacion di FASE. E contesta logico ta pa cosecha un exito electoral, cual ta un practica deshonesto y cuestionabel.

Preocupante ta cu Gobierno di Aruba awor ta inicia e proceso pa prepara y inverti den e formacion di esnan cu ta depende di ayudo financiero pa asina cu na momento anuncio terminacion di FASE esnan cu ta depende di esaki por hasi un transicion pa e mercado laboral un proceso cu lo mester a inicia y wordo prepara luna nan atras. E maneho di Gobierno di Aruba ta carece di un urgencia pa stimula recuperacion economico pa por financia nos calidad di bida como comunidad.

Den e contexto di ausencia di un plan integral pa recuperacion, preocupante ta e situacion di e recorte salarial sin un hustificacion apropia. En bes di inverti den poder di compra di nos cuidadanonan pa asina stimula consumo domestico cual ta un motor pa desaroya actividad y recuperacion economico, nos ta constata cu Gobierno di Aruba no tin nuin intencion pa elimina e recorte di 12.6% den salario di empleadonan publico y semi-publico cu Gobierno di Aruba mes propone.

Mientras cu ta retene salarionan di cuidadanonan limitando nan poder di compra, locual cu ta cuestionabel ta e echo cu no tin transparencia relaciona cu e destinacion di e fundo cu ta wordo genera cu e recorte salarial di 12.6%. Nos ta conclui cu den presupuesto 2021 a reserva 8 miyon pa vacatura nobo y tambe ta subsidia fundacionan unda ta acomoda personanan cu un relacion amistoso of familiar cu nos gobernantenan, locual ta conduci na indignacion serca esnan cu ta sufri e consecuencia di e recorte salarial.

Aruba ta anhela un perspectiva nobo y un vision economico moderno pa asina nos por sali fortifica for di e situacion actual. Ta momento pa nos structura inversionan publico responsabel cu ta genera empleo y entrada digno pa famianan, ademas nos mester enfoca riba desaroyo y oportunidad economico pa Aruba den e area di logistica, economia di conocemento y tambe un vision cu awe mas cu nunca ta ricibi e atencion mundialmente cual ta e concepto di “green economy”. Aruba mester un vision y un perspectiva real pa asina nos realisa nos potencial enorme cu nos tin como Pais.

LEAVE A REPLY

Please enter your comment!
Please enter your name here