Ieteke Witteveen, despues di no acorda cu miembronan di e directiva di cual e ta presidente di dje – Human Rights Caribbean Foundation – riba e ganamento di placa di parti di miembronan di directiva, a dicidi di tuma su retiro. E miembronan cu a resta den e fundacion den un comentario corto riba KKC a duna di conoce cu nunca tabatin plan pa laga directiva fungi como trahado alabes di ta den directiva.

Den un comunicado di prensa e fundado y presidente di Human Rights Caribbean Foundation a duna di conoce cu pa via di diferencia di opinion cu su directiva riba cobramento di parti di e directiva pa trabou haci pa e fundacion, el a dicidi di tuma su retiro. Witteveen riba Radio Hoyer 2 a combersa cu periodista Rick Hart riba e manera con e miembronan di su directiva kier a cuminsa eherce trabou pa e fundacion, asina simultaneamente controlando e ehecucion di nan tarea pa proteha derecho humano, y ofreciendo servicio na e fundacion cu por cobra pe. Esaki den wowo di Witteveen no ta corecto, sigur no pa un fundacion, pero menos ainda pa un organisacion cu tin como tarea defende derecho humano.

Witteveen a bisa di su banda cu desde cu e fundacion a cuminsa crece, a haya un kantoor y tambe 2 extra miembronan di directiva, cual ta inclui abogado Marc Bannenberg. E miembronan aki a ‘dicidi di bay otro direccion’ cu e fundacion, mirando cu lo a bay cuminsa eherce cierto trabou pa e fundacion, pidiendo pago pa esaki. Witteveen ta subraya cu e manera di traha di e fundacion ta a base di trabou boluntario. Pa e rason aki e ta contra cobramento di parti di miembronan di directiva. Sinembargo, esaki no ta nifica cu mester laga afo un reforsa profesional. “Esaki ta loke mi tin henter e tempo ta bringa pe, p’esey nos a logr’e tambe, pero awo ta mira con ta laga atras e parti di recurso humano pasobra simplemente a scoge di bay otro direccion. Nos a haya un trahado hopi capabel cu ta hasta surgi como traductor pero ya a haci menasa contra dje”, Witteveen a bisa riba radio.

Den nan reaccion cortico, e directiva cu a keda atras na e fundacion a desmenti loke Witteveen a trece dilanti, bisando cu e fundacion lo sigui haci e trabou cu nan ta haci pa proteha derecho humano riba e isla. Segun e directiva, e fundacion ta traha cu fuentenan di subsidio ‘renombra’ cu ta exigi permiso explicito pa cada gasto di e fundacion.

 

LEAVE A REPLY

Please enter your comment!
Please enter your name here