Recientemente a tuma nota di un alerta cu Wit Gele Kruis a publica riba su pagina di Facebook, unda a informa cu actualmente tin un scam andando involucrando nomber di e organisacion.

Bon Dia Aruba a acerca Wit Gele Kruis y a papia cu General Manager Sr. Edwin Roos, pa asina por tin informacion mas amplio tocante e sucedido aki y alerta nos lectornan tambe.

Sr. Roos a splica cu e caso ta “cu tin cierto hende cu, in principe no tin nada ban bisa niun forma di identificacion, ni nan ta bisti uniform di Wit Gele Kruis ni auto di Wit Gele Kruis, pero nan ta acudi na casnan priva – sigur casnan priva y p’esey nos a pone pasobra nos no sa si tin mas – bisando cu nan ta di Wit Gele Kruis y cu nan ta ofreciendo cierto servicionan y pa colmo servicionan cu no tin di haber cu e servicionan cu Wit Gele Kruis ta brinda.”

“In principe e scam, si bo kier yam’e asina no ta mucho pensa pasobra nan ta bin ofrece por ehempel bin bende pan cu hotdog, nan a bin ofrece tambe un camp pa vakantie, e tipo di cosnan ey no ta cosnan cu Wit Gele Kruis ta aden,” el a agrega.

E tipo di estafa aki ta un forma comun, cu ta tuma luga tanto online como en persona, y por ta specialmente peligroso di e manera aki pa motibo cu por sinti mas convincente den persona. Usualmente, e estafadornan ta bisti uniform di e organisacion en cuestion, ta carga ID falso of ta usa un manera di papia cu autoridad pa intimida e victimanan, sinembargo manera Sr. Roos a menciona, den e caso aki ta completamente lo contrario.

E scam aki ta ehecuta di un manera cu no ta cautelosamente pensa ni plania, mirando cu e estafadornan no ta carga ningun sorto di verificacion di nan identidad ni afiliacion na Wit Gele Kruis y ta ofrece servicionan y productonan cu ta leu for di Wit Gele Kruis su area di servicio.

Posiblemente esaki ta un parti bon di e metodo cu a scoge, pa motibo cu asina ta bira mas facil di por diferencia ora ta trata di un estafa. Sinembargo, semper ta bon pa tene cautela ora di ricibi cualkier persona desconoci na nos hogar, y mas ainda ora nan ta bisa cu nan ta representante of empleado di cualkier sitio. Cu esaki den consideracion, ta importante pa semper tene na cuenta algun tip pa mantene nos mes safe, specialmente ora cu nos ta topa cu e posibilidad di tin un estafa na porta di nos cas. E prome punto pa semper tene na cuenta ta di pidi un identificacion. Tur empleado legitimo mester por carga un ID, badge of forma di identificacion cu e compania o agencia, semper teniendo na cuenta cu nos no por depende solamente riba uniform, y den e caso aki di Wit Gele Kruis, Sr. Roos a menciona cu tambe tin e vehiculo blanco conoci cu e logo di Wit Gele Kruis.

Den caso cu e persona kier drenta den nos cas, ta util pa verifica prome pa medio di yama e compania prome y usa un number di telefon verifica manera riba un recibo of website oficial pa haci esaki, specialmente si bo no ta sperando un bishita.

Tambe tene na cuenta cu mester evita comparti informacion personal y cualkier comportamento sospechoso, no mester duda den notifica autoridadnan y informa nos familiarnan y bisiñanan tocante e sucedido.

Den e caso di Wit Gele Kruis, Sr. Roos a comenta cu “mas importante ta pa alerta hende cu si nan no tin uniform di Wit Gele Kruis cu ta conoci cu e logo di Wit Gele Kruis ni cu nan ta aparece den un auto blanco cu Wit Gele Kruis riba dje, nan no ta hende cu ta representa Wit Gele Kruis.”

El a comparti cu Bon Dia Aruba cu actualmente nan ta bezig ta investiga e caso aki cu mas profundidad. Nan ta recolectando declaracionnan por escrito pa asina por escala e caso te na polis den caso cu e bira necesario.

Algo cu a menciona den pasado y a bolbe menciona recientemente, ta e hecho cu nos ta mirando un aumento den estafa aki na Aruba, cual a cuminsa online. Aunke e casonan posiblemente no ta relaciona cu otro, e ta algo cu ta pasando na nos isla actualmente, cu un frecuencia creciente y awo a bay di ta online na den persona.

Bon Dia Aruba mes a yega di alerta contra scam usando e nomber y logo di Aruba Today, unda riba rednan social di Facebook y Instagram por a nota cu screenshot di cierto aviso (ads) tabata circula cu ta parce di origina for di e corant na Ingles, Aruba Today. Importante ta di enfatisa cu semper e noticia riba e imagennan en cuestion ta completamente falso y no ta bini for di e corant. Di mesun manera cu Aruba Today, Gobernador di Aruba tambe a cay victima na e estafanan aki. Aparentemente, e grupo di estafador cu ta enfocando riba Aruba, ta crea publicacionnan falso cu ta pretende di bin for di medionan di comunicacion local, pa ora cu hende ‘click’ riba e publicacion, yega na e estafa.

Esaki a cuminsa desde luna di februari, unda ex minister Arends tabata e prome den alerta tocante e scam aki. Riba Facebook el a comparti un di e imagennan aki bisando “esfuersonan andando pa desinforma? difama? of simplemente manipulacion maligno usando e Aruba Today News brand cual mi ta sigur nan no tin nada di haber cu esaki. Pone atencion pa no cai den noticia falso. E potret cu a wordo usa ta di un politico di Romania, Gigi Becali.” Y di mesun manera, e Prome Minister di e tempo aki tambe a cay victima di esaki.

Algun edicion pasa a menciona den Bon Dia Aruba cu e estafanan online aki ta birando mas frecuente y a hasta cuminsa dirigi na nos turistanan, kendenan a cuminsa cay den trampa di ED-Card. Den e estafa aki algun turista a nota cu algun website ta bisa na inicio cu e ED Card ta costa $20 pa persona, pero despues di yena tur informacion necesario, ta mira cu e website a marca un prijs hopi mas halto. Por ehempel, un turista a comparti cu pa dos persona e mester a paga $199,98 despues di yena tur su informacion. Un otro a comparti cu ora a bishita e isla den augustus aña pasa, el a paga e $40 den total pa e y su casa, pero cu den juni mester a paga $69. Otro a conta cu e mester a paga $70 pa un solo persona.

E desaroyonan aki ta preocupante y talbes ta yegando na un nivel unda autoridadnan mester cuminsa involucra di un manera mas fuerte pa combati esaki den corto tempo, specialmente awo cu aparentemente e estafanan ta birando mas frecuente y cambiando di metodo na uno cu ta hopi mas directo y ta hiba peligro na porta di cas di nos ciudadanonan.

Un manera facil y accesible di proteha nos mes ta di no comparti informacion personal cu ningun persona of organisacion desconoci y den caso cu topa cu noticianan sospechoso, reporta esaki na VDA (11911) of KPA (11141), pa asina nos autoridadnan keda informa y al tanto di e desaroyonan.

Ban keda alerta y keda informa.