Representacion politico di e islanan den Tweede Kamer lo por elimina falta di comprension

Docente Politicologia Universitario di Universidad di Leiden ta puntra dicon e relacionnan di Reino ta birando mas dificil. “Palabranan bunita riba Reino ta birando mas bashi,” Wouter Veenendaal ta opina. “Relacionnan di Reino ta caracterisa pa un lucha duro di interes. Un posibel solucion ta cu den Parlamento Hulandes lo por tin representantenan di e paisnan di Reino den Caribe, cu ta por controla Gobierno di Reino. Dinamarca ta prueba cu esaki no ta algo cu ta irealistico.”

Wouter Veenendaal a bisa esaki den un opinion skirbi y publica pa e Asociacion Hulanda Aruba (Genootschap Nederland Aruba) den su ultimo ‘newsletter.’ Veenendaal ta investiga e efectonan di grandura di poblacion pa democracia, cu enfoke special riba politica di islanan chikito. Entre 2014 y 2017 el a ehecuta un investigacion riba seis isla cu tabata forma parti di Antias Hulandes pa e KITLV, Koninklijk Instituut voor Taal-, Land- en Volkenkunde.

Veenendaal a mustra cu manera semper e paisnan den Caribe a mira instalacion di Secretario di Estado pa Relacionnan den Reino, Alexandra van Huffelen como un oportunidad pa restaura e relacionnan cu a bira basta afecta. E mesun speranza, sinembargo, tabata existi cada biaha cu ta bin un Secretario di Estado nobo. A pesar di palabranan bunita, e paisnan y Den Haag ta bolbe confronta otro den conflicto. Segun Veenendaal, tin poco indicacion pa spera cu e Relacionnan di Reino e biaha aki si lo cambia y mehora fundamentalmente. “Kico ta haci cu cooperacion y traha hunto den Reino ta asina dificil?” e docente Universitario ta puntra su mes.

Statuut ta contradictorio

Segun Veenendaal, un prome splicacion pa e conflictonan aki ta basa riba Statuut, cu despues di 1954 ta regula e relacionnan den Reino. “Statuut ta inclui un cantidad di contradiccion. Di un banda e ta crea un Reino Hulandes cu cuater pais autonomo, cu ta igual cu otro. Pero di otro banda Statuut a crea cu un di e cuater pais, cu ta Hulanda, ta mucho mas poderoso cu e otronan.”

Gobierno di Reino ta practicamente e Gobierno Hulandes y e unico organo pa control’e ta e Parlamento Hulandes. E ciudadanonan di e paisnan Hulandes den Caribe no tin ningun derecho di voto pa Tweede Kamer y esaki ta contribui na un deficit democratico cu hopi biaha a keda discuti.

“Statuut ta duna Gobierno di Reino e derecho pa tuma medidanan cu mester garantisa democracia, estado di derecho y bon gobernacion den e paisnan autonomo. Y aunke tur pais ta igual y autonomo, den practica ta un pais so cu por interveni unilateralmente den e otro tres pais.

Interpretacion diferente

Statuut ta crea espacio pa diferente interpretacion, Veenendaal a continua. “Gobernantenan di e paisnan den Caribe ta enfatisa autonomia y igualdad di nan paisnan, mientras cu politiconan Hulandes ta enfatisa e funcion di garantia di Reino. Esaki ta ilustra cu no ta necesariamente e structura di Reino ta forma un barera pa cooperacion, sino e interesnan diferente na cada banda di ocean. Politiconan di Hulanda y di e paisnan den Caribe ta eligi pa gruponan cu ta hopi diferente y mester responsabilisa nan mes na nan votadornan. E interes electoral aki ta forma un declaracion importante pa falta di solidaridad y cooperacion den Reino.”

Veenendaal a bisa cu si tira bista na Hulanda, tin un falta di conocemento y desinteres grandi pa Reino. Algun encuestanan Hulandes cu a organisa a mustra cu un gran parti di e poblacion Hulandes lo prefera pa kibra tur relacion cu e islanan.

Laso directo cu Hulanda

E punto di bista aki tabata existi cu Gobierno Hulandes, particularmente durante e decadanan di 70 pa 90 di siglo pasa, cu tabata kier a pusha e islanan pareu den direccion di independencia. Finalmente, lo contrario a sucede. Antias Hulandes a cay for di otro y cada un di e paisnan a haya un laso directo cu Hulanda.

“Awor cu a bira cla cu e paisnan lo keda den Reino, e strategia di Den Haag ta dirigi pa limita mas tanto posibel e posibel desbentahanan di relacionnan di Reino pa Hulanda. Esaki ta nifica cu ta interveni mas hopi y mas asertivo.” Veenendaal ta bisa cu COHO ta un ehempel. “E politiconan Hulandes sa cu nan votadornan en general tin poco sentimento pa Reino y lo no duda pa tuma un postura fuerte contra e paisnan den Caribe.”

Politica polarisa

E situacion den e paisnan Caribense ta net lo contrario, cu particularmente despues di e pandemia di corona ta luchando cu problemanan economico y social grandi. Tur tres pais tin politicanan turbulento y polarisa, Veenendaal ta opina. Politiconan di e paisnan Caribe sa cu hunga e wega contra Hulanda ta traha bon cu nan votadornan y ta kita atencion for di e problemanan riba e islanan. “Como tal, nan lo no duda pa acusa Hulanda di actitud neo-colonial of di purba re-colonisa e islanan. Door di pone e culpa di e problemanan riba Hulanda, gobernantenan riba e islanan den Caribe no mester asumi responsabilidad pa nan actonan, cu ta duna nan un posibilidad mas grandi pa keda reeligi.”

Segun Veenendaal, e actitud aki por splica pakico algun gobernante den Caribe ta bay den accionnan drastico, manera e strike di hamber di Mike Eman, e menasa pa kima militarnan Hulandes cu Clyde van Putten a haci na St. Eustatius of entrega di keho di racismo contra Hulanda na Nacionnan Uni di parti di St. Maarten.

E lucha fuerte di interes

Na cada banda di ocean ta papia regularmente di Reino Hulandes cu palabranan bunita, pero cu pa motibo di e conflictonan repetitivo, ta zona mas bashi. En realidad, Veenendaal ta bisa cu den practica, Relacionnan den Reino ta marca specialmente pa un lucha fuerte di interes, cu entre otro por keda splica pa motibonan di eleccion. Pero e pregunta ta si por cambia e tendencia aki.

Veenendaal ta argumenta cu un solucion por ta cu tin representantenan di Caribe den Tweede Kamer [red. Mike Eman di AVP den pasado a argumenta pa Hulandesnan di e paisnan autonomo den Caribe tambe participa den eleccionnan di Tweede Kamer. Raad van Advies a duna un conseho negativo y e sugerencia no a yega mas leu.]

Dinamarca

Pero Wouter Veenendaal ta kere cu tin ehempel pa mustra cu un posibel participacion di votadonan den e paisnan den Caribe pa eligi representantenan den Tweede Kamer por funcciona.

Dinamarca tambe tin teritorionan ultramar, esta Groenland y Islanan Faeroe. Cada uno ta manda representante pa e Parlamento Danes. “Si traduci esaki na e situacion Hulandes, e lo nifica cu algun asiento fiho den Parlamento (Tweede Kamer) y posiblemente den Senado (Eerste Kamer) lo mester keda reserva pa representantenan di e tres paisnan den Caribe.”

Mirando e diferencia den grandura di poblacion, por papia aki unicamente di algun asiento, cu kizas den aspecto politico lo no pisa hopi, segun Veenendaal. “Pero di otro banda, e lo nifica si cu e stem di e electorado di Caribe lo keda scucha den e debate politico Hulandes y otro partidonan den Parlamento mester relaciona nan mes cu esaki. Mas ainda, ta resulta cu e cuater asientonan di Groenland y di Islanan Faeroe den e Parlamento Danes tin biaha ta crucial pa formacion di coalicion, di forma cu ta duna e representantenan aki poder politico.”

Relacion di Reino mas balansa

Segun Veenendaal, su proposicion pa representacion den Parlamento Hulandes ta un cambio institucional cu por garantisa un miho representacion di e electorado di e paisnan den Caribe den institucionnan di Reino. “Esey lo por ta e miho prome paso pa un Relacion di Reino mas balansa. E cambio aki lo por conduci na un comprension mas grandi di e motivacionnan di e politiconan di e paisnan den Caribe y di Hulanda y por reduci e posturanan contrario existente den e cultura politico.”

Finalmente, Veenendaal ta kere cu presencia di representantenan legislativo di Caribe den Parlamento Hulandes lo produci un comprension mas grandi di y pa e islanan memey di e votadonan Hulandes, cu e momento ey lo keda recorda cada biaha cu Reino Hulandes no ta limita na Europa.

LEAVE A REPLY

Please enter your comment!
Please enter your name here