Xander Bogaerts ta bira deportista nobo cu lo promove Aruba su turismo

ORANJESTAD – Xander Bogaerts a bira e figura deportivo nobo cu lo promove turismo na su isla natal Aruba, no solamente na Merca, sino na Europa tambe.

Asina a keda consagra pa medio di un acuerdo firma ayera tardi entre director di Oficina di Turismo Aruba (ATA), Ronella Tjin Asjoe-Croes y directora di Dare to Dream Foundation y mama di Xander, sra. Sandra Brown. Algo cu di biaha sra. Sandra a aclaria prome cu lo wordo puntra pa e media presente, ta cu ainda Xander no a firma ningun contract nobo cu su team di Boston Red Sox.

No ta e prome biaha cu ATA ta bin haciendo uzo di nos gloria y heroenan deportivo cu a destaca internacionalmente, entre nan Sarah Quita Ofringa. Tjin Asjoe-Croes a bisa cu deporte tin un luga special pa ATA, no solamente haciendo uzo di nos heroenan deportivo, sino cu ATA su promocion ta wordo sinti den diferente actividad y evento di diferente disciplina deportivo. E biaha aki –y despues di un proceso largo di varios luna– a toca su beurt na e miembro di Boston Red Sox, Xander Bogaerts.

Tjin Asjoe-Croes a defini e acuerdo aki como un ‘win-win-win’, ya cu no solamente Aruba ta sali gana cu e promocion haci pa medio di Xander, sino cu e strea di deportivo aki y tambe Dare to Dream Foundation, cu ta yuda nos hobennan talento di baseball ta sali gana. E ta un acuerdo pa un aña pa balor di 200 mil dollar maximo, cu lo wordo reparti mita pa e fundacion y otro mita pa Xander. E ta den termino di loke ATA ta premira cu Aruba lo haya como retorno. “Sigur nos lo sak’e multiple biaha,” Tjin Asjoe-Croes a bisa.

Sra. Brown a laga sa cu ora Xander ta haya un contract di publicidad pa cualkier producto, ya sea un foto cu un paña di sport, e ta cobra 75 mil dollar pa dos ora di trabou y cuater potret pa Instagram. E fundacion aki tin 5 aña di existencia, caminda sra. Brown lo dedica mas na dje awor cu el a baha cu VUT. Nan ta destina, entre otro alrededor, di 10 mil florin anual pa yuda e team di baseball local ora nan mester biaha.

Promocion
E acuerdo aki ta uno cera pa un aña, caminda Xander y un team di profesional na servicio di e compania encarga cu e promocion di e producto turistico Aruba, lo ta grabando den diferente escenario di nos isla.

Ya caba ayera mes tabata wordo spera cu Xander por tabata presente den e acto di firma di e acuerdo aki, pa asina cuminsa atende cu e compromiso aki, pero a resulta un compromiso inespera p’e. Tjin Asjoe-Croes a declara cu e enfoke primordial di ATA ta promocion internacional y atraccion di turismo di parti di afo.

Den e contexto aki, director di ATA a menciona cu Boston ta nos di dos mercado principal pa Aruba. E volumen di turista di e mercado Mericano ta hopi importante pa nos pais. Xander ta un celebridad den e mercado aki, y tambe un embahador di Aruba. El a laga sa cu un 70% di nos bishitantenan ta bin di Merca, y si nos ta considera cu Boston ta e di dos mercado di Aruba, bo por deduci cu esaki mucho mas grandi cu otro paisnan unda cu ATA tin promocion. P’esey ATA lo haci uzo di e figura famoso y heroe deportivo cu a logra esaki pa su propio merito conhuntamente cu famia, pa beneficio di Aruba su principal sector di economia, esta turismo.

You May Also Like

Pastoor den protesta tambe

Dialuna ultimo, pader Andi a dicidi di uni su mes na e grupo di ...

Caso habitante contra dump Tamarijn no a sigui

E caso civil cu habitantenan a entama contra e dump ilegal na Tamarijn no ...

Prome minister Aruba a yega Hulanda pa prome bishita oficial

Minister Plenipotenciario Guillfred Besaril a bin ricibi prome minister Evelyn Wever-Croes na su yegada ...

IMG_7305.JPG

Homber perdi a keda encontra na Dakota

  Diamars den careda di 3 or atardi patruya di Oranjestad a topa cu ...

30juniNG tiro.jpg

A scucha tiro den caya

Diaranson  algo pasa di 1or di marduga e bisiñanan di Aliviostraat a scucha tiro. ...

Habitantenan di Seroe Patrishi ta harta cu situacion di pos

Ta bay haci 12 aña cu habitantenan di Seroe Patrishi den e projecto di ...