Den un comunicado di prensa, Gabinete Wever-Croes II a informa comunidad cu riba agenda di Conseho di Minister di Reino di ayera, tabatin e punto di agenda di e sosten di likides pa Aruba pa e lunanan di october te cu december 2021.
Nan a informa cu un punto crucial cu ta hunga un rol e biaha aki ta e hecho cu Aruba, a pesar di tur esfuerso, no a logra corta 60 miyon florin den cuido di salud den e aña aki, manera Hulanda ta exigiendo, pero si nan a logra di corta 40 miyon. “Aruba no ta di acuerdo cu ponencia aki, pasobra esaki no ta posibel den un aña di pandemia, pero asina mes Aruba ta logra corta 40 miyon florin si”.
Pa cu esaki, Bon Dia Aruba a tuma contacto cu Xiomara Maduro minister di Finanzas y Cultura, ken a splica cu “aworaki nos a haya un tempo pa asina prome cu e decision lo wordo tuma pa Conseho di Minister di Reino, si den caso cu nos no haya e tranche akinan, esey lo nifica cu nos tin cu bay riba un lista di prioridad pa lo cual ta bira e obligacionnan di gobierno y con pa cumpli cu nan”.
“E lo ta un situacion un tiki fastioso pero nos a pasa den hopi reto como pais, nos a pasa den un pandemia y nos ta gradici cu e yudansa cu Hulanda a duna nos pa surpasa e parti aki”, e mandatario a continua. “Y aworaki nos tur sa cu tin e condicionnan. Parti di tur esakinan tabata e conseho di CAft y nos a reacciona riba e parti akinan, nos ta den combersacion pero di otro banda tambe tin e hecho cu di e condicionnan bo tin entre otro e condicion di AZV di cual a logra corta 40 miyon florin pero nan tabata kier 60 miyon, Aruba no ta cumpli cu e parti aki y nos tur sa pakico, ta condicionnan cu ta hopi fuerte pa nos y e ora ey den e situacion ey nos ta”, Maduro a splica.
Igualmente, el a declara cu nan ta keda cu e punto di bista positivo, e ta un reto, y mescos cu tur e otro retonan nan tin cu surpasa y pa e parti financiero nan tin cu bay traha e ora ey cu otro prioridad pa asina por surpasa e reto, el a declara.
