Esey ta e acuerdo importante…
Desde ayera Aruba tin un acuerdo cu CITGO/PDVSA, y tras di esakinan, cu gobierno di Venezuela, tocante reapertura di e refineria na San Nicolas. Motibo pa celebra pa esnan cu ta kere cu esaki ta un bon paso den avance economico di nos pais; menos bon pa esnan cu ta kere sinceramente cu Aruba mester a busca horizonte nobo pa su desaroyo economico den e proximo decadanan.
Un di e organisacionnan cu ta critico encuanto e acuerdo ta Rainbow Warriors Core Foundation, e subsidiario estableci na Aruba, cu ta opina cu e acuerdo aki ta daña nomber di Reino Hulandes pa loke ta sostenibilidad y di Aruba tambe, na momento cu gobierno ta buscando con pa crea un imagen di vanguardia den sostenibilidad y di ta ehemplo pa otro islanan rond mundo. Tambe Rainbow Warriors ta critica e falta di transparencia den henter e proceso di negociacion. Aki nan a toca un punto fuerte, pasobra en berdad te awe ni parlamento, ni publico en general sa detaye di e acuerdo cu ta bay firma. Ta straño cu como prome paso ta cera acuerdo cu Citgo tocante un propiedad cu no ta ni sikiera den man di Pais Aruba ainda.
Ta bira urgente pa haya sa kico ta bay ta e acuerdo cu Valero Inc. cu ta actualmente propietario di e instalacionnan industrial y lo mester pasa esakinan na Pais Aruba, o na un empresa propiedad di Pais Aruba, a cambio di exoneracion di e responsabilidad ambiental y di otro indole pa cu e propiedad. Entre otro e compania lo keda libera di e compromiso pa desmantela e instalacion, loke automaticamente ta keda den man di e doño nobo pa haci na su debido tempo, dia cu e refineria no tin balor mas. Pero, despues di algun anuncio encuanto e fondo pa limpieza na cual Valero lo ta comprometi, cu lo tabata contene un Afl. 19 miyon, a bira keto y no a tende nada mas al respecto. Te awe no ta existi ningun calculacion experto y di credibilidad cuanto e limpieza final, cu algun dia lo ta un necesidad, lo bay costa comunidad di Aruba, asina ta cu nos no sa mes si e suma aki ta yega pa paga sikiera un parti di e gastonan.
Como agravante mester keda mustra riba e echo cu Aruba keto bay no tin legislacion ambiental, y no ta papia tampoco di esaki, pa por mara e operador nobo na cierto norma den nan maneho di e planta. Ta bunita cu e intencion ta pa bay opera uzando gas natural, pero esey no ta resolve henter e asunto. Nos ta keda pega den e mesun situacion di semper cu no tin norma pa emision di CO2 y di gas venenoso di diferente tipo, y no tin norma con pa actua ora tin derame di petroleo.
Straño tambe ta cu di banda di oposicion ta keda insisti den e discusion infantil ken lo a logra habri e refineria, pero no ta cuminsa haci pregunta critico tocante e condicionnan bao di cual gobierno ta logrando acuerdo cu tanto CITGO/PDVSA como Valero. Dia cu e asunto yega parlamento lo ta laat pa critica, ya cu tur hende, por lo menos e tres fraccion den parlamento, ta contento cu e reapertura y e mayoria berde ta simplemente silencia cualkier pregunta o critica cu por haci. Pero ta importante señala na e politiconan den parlamento, cu nan no ta representa nan mes eyden, sino interes genuino di Aruba y ta importante pa tene bon cuenta cu e efectonan a largo plaso di e acuerdonan.
Mas ainda nos ta haci e preguntanan aki, pasobra no ta exclui e posibilidad cu e acuerdo cu CITGO talbes no ta yega na un implementacion di e proyecto, pasobra nan no por cumpli, pero na e momento ya Aruba lo a hereda e refineria, manera cu e ta, cu tur su riesgonan, for di Valero cu a cana bay sin ningun responsabilidad caba. Anto e ora, kico?
Ta parce necesario pa corda tur hende riba e hecho cu industria petrolero na Aruba por a funciona, gracia na e ausencia di ley ambiental. Si nos observa e actitud di e mesun PDVSA aki, cu na Curaçao ta nenga di haci algo na e contaminacion horibel di un bon parti di e isla, anto nos mester kere cu awor diripiente nan ta bay ta e mucha bon mucha cu ta cumpli cu tur regla ambiental y di bon gerencia.
Na nivel di gobernacion e speransa ta cu e actividadnan nobo na San Nicolas lo duna suficiente aliento den e añanan cu ta bin pa no mester di tuma medida pa coregi rumbo di finanza publico. Por observa cu insistentemente e gastonan fiho di gobierno ta come tur espacio cu gobierno mester pa por inverti di su mes presupuesto y esey lo no bay cambia. Banco Central den su ‘Economic Outlook’ di april 2016 ta conclui p’esey cu hasta den e caso di un reapertura di e refineria, mas ‘consolidacion fiscal’ lo ta necesario pa yega na e metanan presupuestario proyecta.
