Home Regional Yiu di Roberto Rincon aresta na Spaña pa labamento di placa

Yiu di Roberto Rincon aresta na Spaña pa labamento di placa

340

Polis na Spaña a detene ayera mainta na Madrid un di e yiunan di e miyonario Venezolano cera na Merca pa corupcion relaciona cu Pdvsa, Roberto Enrique Rincon Fernandez, den cuadro di un operacion contra labamento di capital procedente di e empresa estatal Petroleos de Venezuela (Pdvsa).

Asina fuentenan conocedor di e aresto di Jose Roberto Rincon Bravo a confirma, y cu a keda realisa pa agentenan di e Unidad de Delincuencia Economico y Financiero (Udef) di polis den coordinacion cu Fiscalia Anticorupcion, pa orden di Huzgado di Instruccion number 27 di Madrid.

E operativo, cu ta habri ainda, ta parti di un investigacion inicial cu e hues Carmen Lamela a habri na Spaña na mita di 2017, ya cu algun luna pasa a pasa pa man di e huzgado na Madrid.

E instruccion di aresto a inicia a base di un dencuncia pa labamento di placa contra dirigentenan di Pdvsa, den epoca di Hugo Chavez. E caso tabata entre otro contra Rafael Rmirez, e presidente di Pdvsa di e tempo ey y despues embahador di Venezuela na ONU entre 2014 y 2017. Parti di e fondonan transferi pa cuenta na Spaña ta procedente di Estadonan Uni.

E Venezolanonan investiga ta relaciona cu e sector energetico y tabata provee servicio y ekipo na Pdvsa, sobornando funcionario pa keda faboreci cu contratonan publico. Asina e propio Rincon Fernandez a reconoce dilanti husticia na Merca, despues di su detencion na 2015, y unda el a admiti e pago di soborno pa sigura prioridad pa su companianan, segun informacion di Departamento di Husticia di Estadonan Uni.

Su yiu tin vinculo cu cuatro sociedad Spaño domicilia na Madrid, segun e datonan di Registro Mercantil Spaño. Jose Roberto Rincon Bravo ta administrador unico di Global Maghas, Producciones Cinematograficas Venezolanas Miranda, Tradequip España Inspeccion y Logistica, y Cibaria Gourmet.

E prome empresa funda tabata Tradequip España, na 2012. Actualmente e tin dos empleado so y ta propiedad di e sociedad Venezolano Tradequip Venezuela. No obstante, e accionista mayoritario di e Tradequip Spaño tabata Beltway Industries, empresa registra na Houston, Texas, unda e magnate Rincon y su dos yiunan, Jose Roberto y Ricardo, ta dirigi e empresa.

Global Maghas a nace na 2013 como empresa dedica na produccion agricola y ganadero, segun e Registro Mercatil. Producciones Cinematograficas, na 2014; y Cibaria Gourmet, dedica na organisacion di convencion y feria di muestra, funda na 2015.

(fuente:ElMundo)