(AP) – Yiunan di e difunto hungado di futbol Diego Maradona a pidi Corte na Argentina autorisa e transferencia di su curpa for di e cementerio priva unda e ta dera na un mausoleum bao construccion na Buenos Aires pa asina su fanaticonan di henter mundo por bini dedica tributo na su persona.
Nan a haci e peticion na Corte di San Isidro den un carta cita diahuebs pa media local den cual nan a indica cu e ta bini for di “tur e herederonan” di e difunto, ken a fayece na aña 2020.
E mausoleum yama “Memorial del Diez” ta bao construccion na e capital su bario di Puerto Madero y ta un “luga hopi mas safe cu esun actual, pa asina tur persona di Argentina y ciudadano di mundo por dedica tributo na e idolo mas grandi di Argetina,” e carta ta splica.
Maradona, ken a lidera Argentina y a guia e pais na su titulo di Copa Mundial den aña 1986, ta dera na Jardin de Bella Vista, un cementerio priva na San Miguel mas o menos 50 kilometer leu di Buenos Aires. Puerto Madero, alrededor di Rio de La Plata, ta un bario druk den e capital unda barnan y restaurantnan ta frecuenta hopi pa turistanan.
Aprobacion di Corte ta necesario a causa di un caso criminal andando contra 8 empleado medico cu tabata involucra den Maradona su cuido prome cu su fayecimento.
Den nan peticion, Maradona su yiunan a indica cu e examinacionnan necesario a ser haci caba cu e curpa y a pidi e transferencia cu condicionnan suficiente di “siguridad y confidencialidad.”
October 30 ultimo, e dia cu Maradona lo a cumpli su 63 aña, su yiunan a anuncia e construccion di un memorial na honor di nan tata despues di firma e acuerdo cu autoridadnan nacional, Buenos Aires y Puerto Madero Corporation, cual a duna un espacio sin cobra.
Maradona a hunga den 4 Copa Mundial desde aña 1982 te aña 1994 y tabata e coach di e ekipo nacional den aña 2010.
