Zachte heelmeesters…Ta sigui yaya hende…

Nos por tin un temporada bastante cayente ainda riba tereno politico, bayendo fin di aña, y esey pa varios motibo. E accionnan di diferente sindicato por bira mas fuerte y tambe a bira conoci cu definitivamente Aruba no ta haya sosten di liquidez di Hulanda pa e ultimo tres luna di aña, y esey mientras a transcuri caba mitar di e periodo ey. Esey fuera di e manera con e noticia a yega na nos. Un anuncio riba Facebook di Banco di Seguridad Social (SVb) a laga sa cu subsidio riba salario a termina caba… per 1 di november. Otro medio a acerca e mandatario responsable pa confirmacion y a haya esaki tambe… Esaki ta forma di comunica? Den e staff di 25 persona cu e mandatario orguyosamene tin, no tin un alma cu sa con pa maneha e tipo di situacion aki?

Di otro banda, nos no mester ta sorprendi cu e manera di actua aki. Ta lamentable cu, mientras cu e situacion obhetivo den hopi caso ta duna e mandatario o gobierno razon, e manera cu ta maneha e situacion ta haci cu hende ta rabia. Ora cu gobierno ta bisa cu no tin placa, y ta berdad cu no tin, pakico inmediatamente su tras ta cuminza purba suavisa e asunto bisando cu ‘tan pronto cu por’ ta bay back na e situacion normal? Y esaki mientras cu nan sa masha bon cu e situacion ey no ta drecha pa awor. Esaki ta por ehemplo e problema grandi cu tin cu e sindicatonan, cu ta haya cu nan tin motibo pa exigi cu e austerisacion di 12,6% mester desaparece. Entre otro ta argumenta cu tin entidad cu no a cumpli y cu esnan cu si a cumpli ta rabia awor pa e trato desigual aki. Si esey ta asina, gobierno ta responsable pa e trato igual ey, sin duda algun. Y pakico?

No tin ningun logica pa bisa cu e situacion financiero di un entidad estatal o semi-estatal ta asina malo cu implementa e medida ta empeora e situacion. Segun nos e situacion malo den un entidad ta duna un motibo mas pa corta salario, pa por sali di e problemanan mas pronto posible. Naturalmente lo mester contempla bon ki aporte e entidad por duna na gobierno, sin afecta su sobrevivencia. Aki por ta cu nan lo contribui menos cu otronan, mientras cu esunnan cu por afford contribui mas, mester haci esey. Esey no ta desigualdad. Pero, ta ken mester duna claridad tocante esaki? No ta aki mas en general tin un problema cu e gobierno aki, cu gusta usa palabra grandi manera ‘transparencia’ pero ta keda corto den duna informacion basico na comunidad?

Ta parce nos cu aki tin un caso tambe di scoge un acercamento publicitario eroneo con ta trece cierto problema, y solucion, na publico. E sindicatonan ta grita awor cu nan kier nan salario atrasa back pasobra a termina e programa di FASE. Ma ta cual sabi a bay bisa cu nan placa ta bay directamente pa yuda e ciudadano sin trabao, cu ta beneficia di e programa aki? No tabata mas inteligente pa no papia di un fondo pa FASE, y paga e ayudo di recursonan general? Ta ken a kere cu ta un bon idea pa simbolisa e ‘solidaridad’ di e empleado publico o semi-publico, marando esaki directamente na e ayudo di emergencia na desempleado y empleado den peligro di perde trabao? Ta pesey awor e argumento ey, cu tabata mustra asina bunita, ta bin dal back den cara di gobierno. Y awor ta surgi e problema, cu mientras nan ta exigi nan salario back, gobierno ainda tin un buraco di mas di 300 miyon florin pa ‘desaparece’ pa yega na un presupuesto balanza, loke di banda Hulandes ta e exigencia. Entrada di gobierno lo mehora na 2022, a base di un economia recuperando, pero no pa cera semehante abismo.

Pa colmo, awor cu cosnan a cuminza pega, awor ta saca huña. Si no por logra un acuerdo, anto ta hiba un ley Parlamento pa concretiza e austerisacion pa e aña venidero; esey ta e mensahe. Esey sigur ta un opcion, si e ta esun mas elegante ta otro cos. Ta keda e punto principal si, cu gobierno den e situacion aki mester di e reduccion di salario te fin di 2022, por lo menos. Protesta fuerte of no, esey no ta cambia e realidad ey.

Basicamente, loke nos ta mira ta tuma lugar actualmente ta e continuacion di e crisis, unda mester tuma medida fuerte, cu pa un parti tabata mara na Covid-19, pero tambe ta pertenece na e crisis financiero general acumula desde varios aña, unda ta dificil pa cualkier gobierno pa sali ileso di esaki. A keda pospone e medidanan, di manera agil pa pasa nan pa despues di campaña, cu a resulta exitoso tambe pa e partido grandi den gobierno, cu por continua su maneho. Sin embargo, e confrontacion a yega y ta cuminza mira awor e consecuencianan di kier a tene tur hende contento pa tanto tempo, pintando e cosnan mas faborable cu nan ta. Te awe ainda no ta bisa e empleado publico cu gasto di personal en general ta insostenible, y cu apenas e austerisacion aki ta representa loke berdaderamente mester tuma lugar pa trece e gastonan aki na un nivel aceptable. E yayamento no a termina ainda.