Di un biologo pa trahado di pan. Y Zaida Everon ta bisa cu ta danki na su conocemento di biologia cu su pannan ‘sourdough’ ta aprecia, te hasta na New York y otro parti di Merca, pasobra “nunca m,a come un pan asina bon,” manera su clientenan di exterior ta bis’e.

Zaida Everon tabata conoci como un di e miho ciclistanan, specialisa den mountainbiking, di Aruba. Pero tambe e tabata docente na Colegio Arubano y mama di dos yiu, kendenan tambe a bira hopi activo den mundo di deporte.

Zaida Everon tabata conoci como un deportista hopi disciplina. E tabata lanta oranan prome cu cualkier competencia pa asina e por come bon y duna su curpa e tempo pa digeri e cuminda. Kiermen, lanta 5’or, 4’or di mainta, no tabata algo straño p’e. Pero unabes su yiunan a cuminza resalta den nan disciplina di deporte, el a laga su mesun deporte un banda pa dedica tempo na nan.

Everon a laga su bicicleta un banda y tabata enfoca riba e bienestar di su yiunan, cu ademas di scol, tabata hinca hopi tempo den gimnasia. Y esey tabata momento cu Zaida realmente a cuminza pone atencion na locual su yiunan tabata come. Su enfoke tabata nutricion. Y asina el a cuminza lesa riba nutricion y particularmente pan, cu na Aruba practicamente ta carbohydrato sin mucho balor nutritivo. Pero durante e periodo aki, Zaida tabata biaha cu su yiunan pa nan competencianan internacional y un cos cu a yama su atencion ta tur e panaderianan chikito y artisanal unda cu e tabata bay. “Na Aruba nos ta custumbra di cumpra pan comercial, cu ta hopi procesa.”

Sourdough

E idea di percura pa miho cuminda, a motiva Zaida pa lesa y busca informacion y asina el a topa cu e ‘sour dough’ esta pan traha cu mansa fermenta. Sour dough ta un pan cu hopi vitamina y no tabata mucho comun na Aruba. “Mas mi a lesa di e pan aki, mas mi a ripara con nutritivo e pan aki ta.” Zaida a bisa cu e tipo di pan aki, e sour dough a pone cambia di pensamento cu pan en realidad ta bon. Pero e mester ta un bon pan, y no uno hopi procesa. Zaida a haya su pan.

Pa traha sour dough mester di ‘yeast’ of ‘gist.’ Pero yega na e ‘yeast’ y e mansa cu yeast no ta djis combinacion di hariña y e cultivo aki. E ta nifica haya e balans corecto. “El a tarda mi ocho luna pa mi por a logra e prome pan di sour dough cu tabata smaak bon pa come,” Everon a bisa. Pero locual tambe tabata fermenta den su cabes tabata e idea pa lanta su mesun negoshi di pan, e mesun tipo di panaderia artesanal cu e tabata observa den exterior.

Cu un ‘sour dough’ cu por fin a resulta di ta smaak bon y e realisacion cu tin otro reto pa supera, Zaida Everon a dicidi di cambia rumbo. Despues di a cana cu e idea na 2018, na comienzo di 2019 el a sigui curso riba pan na Aruba mes y tuma e paso drastico pa retira di Colegio Arubano como docente. “Mi tabatin mucho hopi pa duna, mucho creatividad pa limita mi mes y keda un solo caminda. Y mi a dicidi di bay.”

Zaida Everon a dicidi pa dedica su mes pa bira panadero. Inicialmente e tabata experimenta cu su famia, tabata regala nan pan pa bebe cu koffie y tur tabata tuma cu gana. Su famia tabata pidie pa e pan y cierto momento el a cuminza cobra y nan no tabatin problema pa paga. El a expande su circulo cu su ex-coleganan na Colegio Arubano y e reaccion tabata similar. Como bon biologo, e tabata sa cu unabes e smaak a drenta, e gana pa mas a bira algo natural y esey a permiti Zaida cuminza cobra pa su pannan, tur traha na su mesun cas. Y literalmente un boca a bisa otro te cu e nomber di Zaida y e reputacion di su pannan a yega na comerciantenan.

“Ami mes no lo a tribi pa acerca comerciantenan. Mi tabata bende cu famia, cu bisiñanan, conocirnan. Mi tabata manda WhatsApp cu un mensahe special, cu descripcion y storia y un ex-colega a tuma e mensahe y mand’e pa nan circulo di amistad. Asina e circulo di cliente a crece.”

Den un periodo record, sin mucho experiencia di mercadeo pero cu energia inagotabel, Zaida a cuminza expone su producto, entre otro na Kadushi Festival cu a produci mas cliente. Na comienso di 2020, aña a cuminza cu mas pedido y Zaida su negoshi a redobla y tabata entrega pan dos biaha pa siman. E pandemia na Maart 2020 por a forma un problema, pero como 50 cliente a pidi Zaida pa sigui produci e pan y mas ainda, el a expande su produccion cu ‘sweetrolls’ cu e tabata bende via Island Grind. “Asina nos a crece hunto. Nan a haya mi clientenan y mi a haya nan clientenan.” Rednan Social a contribui na su reputacion y e entrega di pan a aumenta di dos pa cuater biaha pa siman. Awendia, su panaderia ta habri seis biaha pa siman, di Dialuna pa Diasabra; Aunke cu Dialuna no ta horna pan.

Zaida a cuminza su so cu su panaderia, y awor tin dos trahado fiho y dos free lancer, banda di su yiunan cu ta yuda tambe, cu ta yuda cu benta y administracion.

Motibo ta cu Zaida por combina ingredientenan specifico segun e tema di e menu. Y motibo pakico e pan di T2Pan ta asina gusta pa conocedornan ta e ‘starter,’ esta e cultivo di yeast cu e mes a crea. Cada uno ta diferente y e conocemento di biologia di Zaida a contribui na e ‘starter’ unico, cu ta keda e base di tur su pannan cu awor ta crusa frontera.