Na Hulanda, tur hende muhe na estado cu tin planea pa bin Aruba ta wordo conseha pa cancela esaki relaciona cu e virus di Zika. E conseho ta bin a base di un maneho cu ta wordo hiba pa Rijksinstituut voor Volksgezondheid en Milieu (RIVM) pa tur pais cu ta wordo considera un risico grandi pa e virus di Zika y Aruba tambe ta cay den e lista aki.
Desde mei 2015 tin un epidemia di Zika na Brazil cu poco poco a haci su entrada riba nos isla tambe. Manera Bon Dia Aruba a raporta caba den e edicion di ayera 14 di maart, sector medico a bati alarma pa e situacion, pero no a duna nan atencion. Departamento(nan) concerni no a alerta pueblo manera nan ta haci normalmente. Solamente departamento di salud a adverti contra ‘rash’ mientrastanto esaki tambe por ta un sintoma di Zika. Awor tin 700 casonan sospechoso na Aruba. Y ta confirma cu tin dos caso registra aki na Aruba di hende muhenan na estado cu e virus di Zika.
Na luna di februari un dama Arubiano a bay haci su control na partera y a avisa cu e lo ta biahando pa Aruba. Aki el a wordo desconseha di biaha pa su isla natal relaciona cu e risico grandi pa haya e virus. E dama ta conta Bon Dia Aruba cu su partera a splic’e cu si e dicidi pa bay toch, e lo mester haci control na un Zika poli na momento cu e regresa.
Bon Dia Aruba lo tuma contacto cu VNO (representacion di Hulanda na Aruba) pa un reaccion riba e conseho aki cu ta wordo duna na hende muhenan na estado, ya cu na Aruba mes no a duna niun indicacion di esaki.
