​Tin bendedo ta cumpli pero semper tin esunnan cu ta purba di no sigui regla

Desde dialuna e comision di klapchi ta controlando e luganan di bende klapchi. Cada departamento den e comision tin nan propio ruta, y Brandweer den dos dia a controla 70 luga of mas. Bon reaccion a wordo duna con cosnan ta bayendo, pero tin cu ta purba di no sigui e reglanan.

Con para cu añanan anterior e bendedonan di klapchi ta cumpliendo cu e reglanan cu e comision di klapchi tin. Sr. Frido Dirksz di departamento di Prevencion di Brandweer a bisa Bon Dia Aruba, cu nan ta hayando hopi bon reaccion. Pero semper ta haya un par di e bendedonan cu ta purba di no sigui e reglanan. Esaki ta pone cu otro aña un biaha mas e comision lo yega hunto pa asina structura tur cos pa yega na nan.

Cera luga di klapchi

Tin luga cu a wordo cera pa motibo cu e container a wordo pone cerca di caminda y esaki no mag, pasobra no por stroba trafico. Segun Sr. Dirksz, e comision di klapchi ta bisa e bendedonan cu no mag di pone container cerca di caminda y esaki ta algo cu ta andando desde 2011. Prome cu esey caba tabata tin e problema aki. E comision di klapchi ta percura pa bisa e bendedonan cu nan mester pone nan cosnan na ordo, na un distancia. Esaki ta parti di polis. Pero asina mes semper ta haya esunnan cu asina mes kier prop un na nan manera, e ta comenta. Esaki ta pone cu tin consecuencia pa e bendedonan aki. Loke e bendedonan mester corda ta cu pa pone un container, nan tin cu pidi un permiso precario si e tereno ta di nan. Of si nan ta haci uzo di tereno di otro persona, e bendedo mester tin un carta di e doño di tereno cu ta bisa cu e bendedo por uza esaki. E ta sigui bisa cu esaki ta cosnan cu ta pasando di cual tin biaha nan no ta tene cuenta cu esakinan ni e distancia di caminda.

Tuma medida contra esunnan cu no ta cumpli?

A puntra Sr. Dirksz si pa otro aña e comision lo tuma medida contra di e bendedonan cu no ta sigui e reglanan cu tin. “KPA ta esun cu ta duna permiso of kita esaki,” e ta sigura Bon Dia Aruba. “Nos ta djis conseha nan,” Sr. Dirksz ta sigui bisa. Dialuna dos luga a wordo cera pa motibo cu nan mester a wordo hala pasobra nan no tin e permiso precario y e bendedonan tin cu percura pa haci esey.

Cumpliendo cu rekisitonan

E departamento di prevencion di Brandweer ta wordo parti den grupo, unda cu cada grupo ta pasa controla e luganan di klapchi. Di parti Brandweer, nan a haya cu mayoria den Noord a cumpli cu nan parti, segun e bombero. E ta sigui bisa cu ayera den area di Paradera tambe nan a pasa controla y por a mira cu e bendedonan ta cumpliendo. Tambe un otro grupo di e departamento di prevencion a controla den Oranjestad y aki nan a mira cu gran parti ta cumpliendo cu e rekisitonan di e comision.

Duna bendedo conseho

Brandweer su parti ta pa controla cu e luganan di klapchi tin tur e materialnan necesario pa cualkier incidente, pero asina mes nan ta tira bista riba e klapchinan. Durante e control tin caminda cu nan a topa e bendedo a pone por ehempel mas tipo di pagara. Aki nan ta conseha e bendedonan pa warda algun di e klapchinan. Tin caminda cu polis a pone remarca di a haya e luga cu hopi cos y a bisa nan pa hala esakinan. Esunnan cu ta prefera di pone mas cos riba e shelf ta topa cu consecuencia ora cu e comision pasa controla. 

Sr. Dirksz ta kere cu dia 31 lo bay tin mas advertencia pasobra cosnan lo bira mas druk pa e comision. Dia 31 e bendedonan por bende te cu 9’or di anochi y di cual gran parti ta cumpli. Pero tin esunnan cu ta echado di baina, y no ta cumpli. E comision lo spot check e luganan y si nan wak cu cos no ta bon di biaha nan lo baha pa atende cu e situacion. Semper ta bon pa e bendedonan di klapchi check bon e reglanan cu tin y pa sigui esaki.