12 diferente artista for di 12 diferente destinacion den Caribe trahando hunto na Aruba

Ministerio di Cultura a ricibi un presentacion di Ateliers ’89 y Vibrations PR pa mira e potencial di e proyecto Caribbean linked. Minister Otmar Oduber mesora a mira e potencial di e proyecto aki ya cu ta trata di artistanan den Caribe cu lo bin Aruba y uza nos isla como inspiracion pa crea arte. Consehera principal di Minister Oduber ta indica cu ta trata di un proyecto multifacetico y internacional cual ta pone Aruba riba un plataforma diferente y eleva ora ta trata di arte. Ta di e forma aki Caribbean linked por conta cu sosten di Ministerio di Cultura.

Caribbean linked ta un proyecto residencial unda pa 3 siman largo 12 artista representando diferente destinacion den Caribe cu lo huesped na Ateliers ’89 y hunto nan lo prepara un exposicion inspira pa Aruba. Durante nan estadia riba nos isla lo tin tayer pa artistanan local tambe. E artistanan a yega Aruba e siman aki unda cu ta conduciendo un serie di tour riba nos isla pa laga e artistanan conoce un poco mas di nos isla. Durante e tournan lo bay tambe diferente studionan di artistanan pa asina nan por mira di cerca con nos artistanan ta traha, y di e forma aki tambe crea un colaboracion entre e artistanan di full Caribe y nos artistanan local.

Den e colaboracion aki lo intercambia informacion y tambe kisas tecniconan cu cada un ta uza pa nan obranan. Artistanan di entre otro Antigua, Guadaloupe, Bahamas, Jamaica, Barbados, St. Lucia y Trinidad and Tobago ta compara desaroyo artistico di nan pais cu e desaroyo cu ta tumando luga aki na Aruba. Tur aña basa riba e aspecto linguistico ta scoge pa haci invitacion na diferente islanan den Caribe. Banda di e aspecto linguistico ta scoge tambe islanan cu hopi biaha no ta ricibi atencion den e mundo di arte.

P’esey e aña aki a scoge tambe por ehempel Cayman Islands, U.S. Virgin Islands, Guayana y Haiti. Esaki ta demostra e diversidad cu tin entre e artistanan cu ta riba nos isla y tambe e desaroyo cu tin pa e arte den nos region.

E experiencia di e artistanan cu awor ta na Aruba ta algo unico. Mayoria di nan tin e perspectiva y a prepara nan mes pa tur e diferencianan cultural cu nan lo a topa riba nos isla. Pero e realidad ta cu nos tin hopi mas cos en comun cu ta conecta nos como un region.    

Caribbean Linked ta un colaboracion di Ateliers ’89 di Aruba trahando hunto cu Fresh Milk di Barbados y tambe Arc Magazine di Holly Bynoe, Annalee Davis y Elvis Lopez.

Intencion ta pa tur obra cu keda crea den e 3 siman nan aki di Caribbean linked a wordo presenta den un exposicion dia 21 di augustus proximo, unda tur obra lo ta na benta tambe. Obranan inspira pa tur e scenarionan cu nan por a experiencia durante nan estadia riba nos isla.