Ministerio Publico a exigi 15 aña di prizon incondicional pa e padrastro Gabriel Martin kende a maltrata Rishandroh y Eugene den un forma asina grave cu ambos mucha a fayece di nan heridanan. Tambe a exigi TBS, esta tratamento obligatorio pasobra e chens ta grandi cu sr. Martin lo ripiti delitonan di violencia grave.

OM tambe a pidi awe den corte 4 aña di prizon pa mama Risheila Frans di locual 3 aña di prizon incondicional y 1 aña di prizon condicional. Pasobra OM ta haya cu tin suficiente prueba cu e mama a facilita e padrastro pa abuso di su yiunan y of pa mata nan.

Hues lo duna sentencia riba 6 juli.

E famia a reacciona rabia ora a tende e exigencianan di OM. Un poco prome un tanta (ruman di e tata biologico di ambos mucha) a hiba palabra. Unda el a haci un suplica na hues pa tuma e miho decision cu por pa asina husticia prevalece.

Sinembargo despues di scucha e exigencianan, e famia a expresa nan disgusto. “Mi no kier keda aki mas”, e wela (mama di e tata biologico di ambos mucha) a grita na yoramento.

Henter e proceso e tata biologico di Rishandroh y Eugene, Orlando Anastacia tambe tabata emocional, temblando y keda wak den direccion di e padastro. Un persona den siguridad a keda para cerca di dje, pa asina preveni si e tata lo lanta den rabia.

E sospechoso principal Martin mes a reacciona trankil, casi sin emocion. El a contesta e preguntanan di hues y OM trankilo y admiti cu locual el a haci ‘no tabata algo normal’. Y cu e mester ayudo.

“Si abo tabata sinta riba mi stul, ki castigo bo lo duna bo mes”, asina hues a puntr’e. “Bo lo a duna bo castigo di prizon y TBS manera nan a recomenda?” (Esaki a sali for di investigacion  psikiatrico y reclassering).

Sr. Martin a contesta: “Si, mi ta willing pa coopera.”

Muchanan maltrata tur dia
Hues a puntra cu hopi persistencia riba e abuso di e muchanan: Si nan wordo maltrata tur dia, pa cuanto tempo y con nan a wordo maltrata precisamente.

Asina e situacion di e muchanan a bira mas cla: for di 2014 e abuso a cuminsa. Rishandroh tabatin 5 aña ora el a fayece na hospital aña pasa. Eugene ya tabata morto y dera un par di luna  den mondi na Savaneta. E tabatin 3 aña. Pues no keda nada otro pa conclui: henter nan bida cortico e muchanan a experiencia violencia.

Segun e mama tur dia nan a wordo maltrata momento cu nan a muda den un appartament hunto fin di augustus 2017. Y maltrata mas cu un biaha pa dia. E padrastro a admiti cu el a dal nan tambe cu palo di basora y cu moketenan riba nan curpa y cabes. Pero el a nenga di kima Eugene cu awa cayente y a bisa cu esey tabata un accident.

El a nenga tambe cu e tabata responsabel pa e manchanan riba e curpa di Rishandroh, indicando cu el a kim’e cu sigaria. “Mi no ta huma te awor”, el a contesta OM.

Sinembargo ora OM a puntra con e ora e tabata uza su marihuana, el a admiti cu e tabata uza e papel di sigaria pa huma e droga.

Castigo maximo
OM a reacciona hopi fuerte riba e expresionnan haci den media y reaccionnan riba social media unda hopi hende ta exigi cu mester duna castigonan maximo den e caso aki. Fiscal a bisa cu den e caso aki mester wak ambos banda. Pasobra e sospechosonan mes a bin for di un pasado yena cu violencia. Y cu nan tin problemanan mental. Y manera e mama mes tabata bou menasa continuamente.

E pregunta ta keda sinembargo con tabata posibel cu e abuso di e famia aki por a keda continua asina largo. Ora e padrastro a hinca e mama cu un cuchiu den su pia, esaki a yega hasta asina leu, cu e padrastro a wordo condena na 6 luna incondicional. Sinembargo te eynan el a keda. E mama tabata na estado na e momento ey di e yiu cu si a sobrevivi e drama.

Dicon na e momento ey instancianan no a haci un investigacion profundo den e famia, ta keda un misterio. Locual Bon Dia si a haya sa ta cu e caso di hincamento a keda y muri na polis. Pues e no a yega na instancianan manera Voogdijraad na e momento ey. Algo cu awor gobierno ta purbando di drecha, cu instancianan, polis, husticia si tin miho intercambio di informacion pa evita casonan asina.

Sinembargo pa Rishandroh y Eugene, manera por a mira cla den e sala di corte awe, no tabatin niun ayudo. Ni di nan mama, cu OM sigur a mustra cu ainda nan ta hay’e parcialmente responsabel pa no proteha su yiunan manera mester ta. Famia cu tabata expresa nan emocionnan e dianan aki, a declara cu nan tambe a mira cu e mama tabata disciplina e muchanan duro. 4 testigo a declara esaki, pero den corte e mama keda nenga, declarando: “Mi no a maltrata nan. M’a dal nan si pero riba nan pia so.”

Asina Rishandroh y Eugene a wordo lanta den un cas yena cu violencia tur dia. Dado momento Rishandroh mes tabata sa cu e situacion no tabata algo normal. Tin biaha e abuso tabata asina grave, cu e no por a cana mes. E no por a bay baño y mester a bisti pamper bek pasobra casi sigur su bekken tabata fractura.

Cu 5 aña so el a habri boca finalmente y conta su mama. Pero ni e curashi aki a yuda preveni e morto di su ruman chikito y finalmente di su mes.