Campeonato di Aruba Softball Bond ta inicia diabierna awor 12 di Mei pa 7pm na veld di Flatstone. Campeonato ta wordo dedica na dos baluarte uno femenino y uno masculino. E aña aki ta dedica campeonato na baluartenan Sra. Bertha Wolf Croes y Eugenio Bertrando “Tan” Helder 2 personahe cu a contribui hopi na e deporte di softball. Awe nos lo repasa e biografia di Sra Bertha Wolf Croes den deporte como cu Bertha ta un artista tambe conoci den pueblo. E pasion pa deporte a cuminsa, ora cu e muchanan den bario ta aglomera den sabana, pa hunga diferente wega, manera kiniki, trom, bomba y futbol.
Ora Bertha tawata mas chikito, e no por a hunga ainda cu e muchanan cu ta mas grandi, pero Bertha tawata mag di piki e balanan cu ta cay den cunucu. Asina poco poco e tambe a cuminsa hunga bomba cu nan. Lucia, ruman di Bertha, tawata hunga softball cu Red Stars di Sta. Cruz. El a dicidi di forma su mesun team di softball na aña 64 mas o menos y a yam’e Cardenales. Net e aña ey Cardenales a bira campeon den Grandes Ligas, p’esey a uza e nomber. Den e team di Cardenales Bertha a haya training den outfield, segunda base y pitcher. Y pues Bertha a bira pitcher di S.V. Cardenales, suplente pa centerfield y segunda base. Bertha a participa pa su team Cardenales na diferente torneo di softball rond Aruba, principalmente como pitcher.
Despues di a participa un tempo na e weganan di bush league den añanan 60, Cardenales a cuminsa participa den competencia di Aruba Softball Bond den añanan 70. Den e mesun tempo Bertha a forma parti di e seleccion di softball como pitcher pa representa Aruba na Caracas, Venezuela, den e weganan di intercambio hunto cu Plymouth y Nesbitt’s Softball Team. Na aña 73 mas o menos, Lucia a forma tambe su propio team di futbol bou di e mesun nomber di Cardenales, ya cu e interes pa futbol di dama a cuminsa lanta na Aruba. Akinan Bertha a bira keeper pa e team di Cardenales. Asina tambe Bertha a sigui participa den diferente torneo na Aruba, como keeper pa su team y como suplente midvoor. Cu e team di futbol Cardenales Bertha a biaha 2 biaha pa Corsou y aya wega a tuma luga. Nan a hunga riba veld di S.U.B.T. contra diferente team di Banda Bou. Den un otro ocasion, den un intercambio deportivo y amistoso, seleccion di futbol di dama Corsou a biaha pa Aruba y a enfrenta e seleccion di Aruba den Wilhelmina Stadion e tempo ey. E seleccion di Aruba na su turno a biaha pa Corsou y asina enfrenta e seleccion di Corsou. Bertha a participa como keeper pa e seleccion di Aruba. Esey tawata b.d.d. Sr. Rosendo Aparicio, d.f.m. Den añanan 70 Bertha a forma parti tambe di e team di volley “Sporting” di Sta.Cruz pa un temporada. Volley ta un di e sportnan cu Bertha a gusta masha hopi mes. Asina Bertha a move tambe cu “Sporting” den diferente torneo di volley na Aruba.
Den e añanan 80 Bertha a forma parti di e team di softball “Montaña Braves” como pitcher b.d.d. Sr.Nel Frank pa basta tempo. Un team cu Bertha a gusta hopi pa e bon amistad y bon ambiente tur diadomingo riba veld di Montaña. Como cu Bertha tawata emplea na diferente banco, y durante cual tempo empleadonan di banco a forma un organisacion pa asina organisa anualmente un torneo di banco. Asina tambe Bertha a representa su respectivo banconan, manera Aruba Bank, Citibank y C.M.B. den e diferente sportnan manera: softball, futbol, basket, volley y tambe atletiek. Como empleado di OHRA tambe tur empleado a haya e oportunidad di bira miembro di Racquet Club y asina a practica cu colega e dushi deporte di tennis pa un temporada den e añanan rond di 2000. Bertha Wolff-Croes: Tur e añanan aki tawata añanan di oro pa e bunita experiencia, pa cada amistad y e goso den cada Victoria, cualnan a percura pa haci mi hubentud hopi bunita y uno inolvidabel. Mi ta gradici mi ruman Lucia Geerman-Croes pa e bon guia y tur e oportunidadnan cu el a brinda mi, pa por a practica deporte cu hopi amor.
Danki grandi ta bay tambe na e dirigentenan, e coachnan, cu a haci un tremendo trabou cu hopi pasenshi durante tur e temporadanan aki: Sr. Nicolas Dirksz d.f.m., Sr. Frans Maduro, Sr. Jachi Maduro, Sr. Aubrey, Sra. Lucia Geerman-Croes, Sr. Rosendo Aparicio d.f.m., Sr. Pachi Maduro, Sr. Edi Maduro, Sr. Jonco Albertsz y Sr. Hector Albertsz, Sr. Nel Frank y famia Tromp di veld di Montaña. Sigur un danki na tur otro colega deportista di tur e teamnan, specialmente S.V.Cardenales Softball & Futbol Team, S.V. Sporting Volleyball Team, Montaña Braves Softball Team y mi ex coleganan deportista di banco y ‘last but not least’, tur fanatico cu a gosa sigur di tur e momentonan dushi di tension. Danki pa semper tabata t’ey cu e tremendo apoyo. Danki na Dios Tata pa tur e bendicionnan y pa a duna mi e boluntad y talento pa a practica deporte, un bunita recuerdo. Mi ta spera cu esaki mi por ta ehempel pa nos hendenan y nos hobennan, kisas pa duna nan curashi pa haci deporte y asina dedica na movecion pa un crecemento sano y saludabel. Danki na Sr. Endy Croes y Sr. Chipen Chirino, Presidente y Vice Presidente di Aruba Softball Bond pa e bunita gesto di reconocimento. Mi ta sinti mi hopi feliz pa e atencion, cual a pone mi rebiba hopi momento agradabel y di felicidad di mi dushi tempo. Masha danki! (: Aruba Softball Bond orguyosamente ta dedica campeonato oficial di softball fastpitch 2017 na Sra Bertha Wolf Croes. Bertha masha danki pa Bo aporte y contribucion na deporte en general y nos deporte di softball
