La Fama ta supera Estrella

Den siman cu a pasa e campeonato di AVB division femenino a continua, caminda e ekipo di Savaneta, La Fama, a logra un triunfo cu anotacion di 5-0 riba Estrella.

E hoben talento di futbol femenino, Shadira Croes a anota un hattrick den e partido aki pa guia su ekipo na e triunfo, logrando La Fama asina su di cinco triunfo den e prome buelta di e campeonato contra di un empate y dos derota pa un total di 16 punto. For di inicio di e partido La Fama a pasa pa domina e accionnan y por a mira riba tereno e refuerso nobo di e ekipo di Savaneta, esta e hungado di medio campo, Lissandra Fradl, kende a duna e ekipo un empuhe ofensivo adicional. E prome gol di e wega ta cay na di 10 minuut di e prome tempo, ora cu Shadira a ricibi un paso, kita un defensa pa despues deposita e bala den net pa pone La Fama ariba 1-0. Un gol cu a habri caminda pa un dominio completo di e ekipo aki, pero simplemente no a probecha di e dominio aki, fayando situacionnan di gol clave.

 

 

E centro delantero, Yennifer Huntington a haya oportunidad pa aumenta e marcado pero ta mira un tiro wordo blokia pa keeper di Estrella y despues su tiro ta sali net na banda, pero tabata mesun hungado aki cu a percura pa aumenta e marcado na 2-0 pa La Fama ora cu el a kita dos defensa y keeper pa pone e bala den net. La Fama a sigui domina, pero tabata slordig den su wega for di memey di tereno cu e parti ofensivo, pero asina mes ta bin aumenta e anotacion na 3-0 prome cu sosiego a drenta ora cu Lissandra Fradl a penetra den area penal, pasando entre varios defensa di Estrella pa despues facilmente pusha e bala den net y pone e score final despues di e prome tempo, na 3-0. Den di dos tempo Estrella su wega a bira mas compacto y e hoben ekipo a duna bon resistencia tratando di probecha mas di velocidad di su delanteronan pero no por a logra na supera e defensa di La Fama. E ekipo di Savaneta a sigui cu su dominio riba e accionnan pero a faya na varios ocasion cu varios posibilidad di gol cu no a wordo probecha pa falta di precision pero den e parti final di e wega, La Fama a cuminsa cu miho combinacion y tabata bira mas peligroso.

Shadira Croes den un avance riba banda robes ta yega te dilanti keeper di Estrella y ta pone e bala den skina pa pone su ekipo ariba 4-0, pero e gol mas espectacular a bin despues di tremendo combinacion entre Yennifer Huntington y Lissandra Fradl kendenan a pasa den e defensa di Estella y finalmente ta pone Shadira su so dilanti keeper y e ta logra anota su di tres gol di anochi pa pone e score final na 5-0. Cu e triunfo La Fama ta logra su di cinco triunfo pa subi pa di cuater puesto riba e tabla di posicion faltando un wega mas pa hunga pa caba cu su compromiso den e prome buelta di campeonato. E wega aki ta ser hunga diaranson venidero ora cu La Fama enfrenta Arsenal den stadion Guillermo Prospero Trinidad pa 8or di anochi.

You May Also Like

Aruba Tang Soo Do ta organisa Copa Betico

Riba Dia di Betico, Aruba Tang Soo Do federation, conhuntamente cu tur e scolnan ...

Aljereau Sophia y Veronique Antens ta gana e Crossfit Open 2019

ORANJESTAD – Atletanan Veronique Antens y Aljereau Sophia ta gana e Crossfit Open 2019 na Aruba. Despues di ...

Atletanan di taekwondo lo competi den e Open Taekwondo Costa Rica 2017

Awe un delegacion den e deporte di taekwondo lo sali pa Costa Rica, unda ...

Brian Howell a gana medaya di ORO na Saint Lucia

Recientemente e boxdo Brian Howell a biaha pa Saint Lucia pa participa den torneo ...

Clubnan di futbol entusiasma cu plan strategico di AVB

ORANJESTAD – Recientemente federacion di futbol, Arubaanse Voetbal Bond (AVB), a presenta nan plan ...

Nominadonan aña deportivo 2016

Pa di 13 biaha consecutivo lo entrega e premionan pa e atletanan na e ...