Banco Central ta bati alarma: costo di bida ta sigui subi, poder di compra ta cayendo y calidad di bida di e pueblo Arubano ta deteriorando.
Parlamentario di MEP, Dangui Oduber, ta critica duramente e hecho cu Gobierno ta celebra un surplus di 700 miyon florin, mientras cu miles di famia Arubano ta lucha diariamente pa yega fin di luna.
E informacion aki ta forma parti di e publicacion “Quarterly Tables Real Sector 2026-III”, publica door di Banco Central di Aruba (CBA) dia 12 di november 2026. E documento ta presenta cifranan riba actividad economico, confiansa di empresarionan y consumidor, turismo, prijsnan y otro indicadornan clave di nos economia durante e di tres kwartaal di aña.
E cifranan di Banco Central ta alarmante. 90.4% di consumidor ta indica cu nan no por cumpra mesun hopi cu seis luna pasa. Ademas, 46.5% ta spaar menos placa y 26.3% no ta spaar absolutamente nada.“Esaki ta e realidad doloroso di Aruba awe. Pueblo ta traha duro, pero placa no ta yega. Gobierno ta bira mas rico, mientras cu pueblo ta bira mas pober!”
Oduber ta haya inaceptabel cu, mientras Gobierno ta dispone di un surplus miyonario, no ta implementa ningun reduccion di impuesto pa duna pueblo alivio. “700 MIYON DI SURPLUS! Cuanto placa mas Gobierno kier acumula mientras cu pueblo ta sufri? Di kico un surplus ta sirbi si famianan no por paga nan compras, awa, coriente y gasolin?”
Segun e parlamentario, crecemento economico no tin ningun balor si e ciudadano comun no ta sinti progreso den su cartera.“Gobierno ta celebra cifranan bunita, pero pueblo ta contando cada florin pa sobrevivi. Esey no ta progreso economico, esey ta fracaso di maneho!”
Pa conclui, Oduber ta exigi pa Gobierno tuma medida inmediatamente pa reduci impuesto, baha costo di bida y recupera poder di compra di pueblo Arubano.
“Pueblo no por come surplus! Pueblo no tin mester di mas cifra bunita. Pueblo tin mester di alivio awor!”



