+297 Restaurant a lanta denuncia contra Polis

297 Follow Up (3).JPG
Segun declaracion di abogado Chris Lejuez, doñonan di restaurant +297 lo entrega un denuncia contra e oficialnan cu lo a uza forsa desproporcional contra nan persona den un confrontacion ultimo fin di siman cu a shock henter pueblo di Aruba.
 
“Mi ta hopi decepciona con e cos aki a bay. E situacion ta preocupante anto nan a viola derechonan humano den e manera cu nos a wordo trata,” casa di e doño di +297 Restaurant ta bisa Bon Dia Aruba. Segun abogado cu ta representa e establecimento, Chris Lejuez, polis a uza forsa desproporcional por lo menos dos biaha. Segun Lejuez, e doñonan a wordo conseha pa entrega denuncia contra autoridad anto pa loke ta e caso mes, esaki ta bao investigacion di e abogado tambe pa logra determina ta kico a bay robes diadomingo mardruga. Bon Dia Aruba a haci varios intento pa comunica cu Cuerpo Policial pa un reaccion, por ehempel riba e oficialnan herida pero no a logra. Rapport di polis ainda no ta cla dus no tin declaracion oficial di parti di Cuerpo Policial ainda. Segun declaracion di abogado Lejuez, nan ta sigura cu e luga tabata cera pa publico na momento cu polis a presenta anto cu no tabata tin ningun benta di alcohol
 
Imagen di camara
Riba nos pagina di web www.bondia24.com, nos a publica algun imagen di camara di seguridad como tambe partinan di grabacion cu a wordo haci cu celular ora cu e confrontacion tabata andando. Varios di e comentarionan cu a circula despues di e publicacion aki tabata ta cu no a publica e video completo y cu solamente a mustra e partinan di e confrontacion ora cu esaki a bay for di man. Empleadonan como tambe casa di e doño, Sra. Sandra Lugo De Suegart, a coopera cu Bon Dia Aruba anto comparti cu nos e videonan completo desde inicio te na final. Algun di e otro comentarionan tabata ta cu tabata tin un fiesta secreto den un luga scondi anto priva. Segun Sra. De Suegart: “Despues di apertura di  ‘fashion week’, nos a reuni cu algun amigonan den un encuentro social gewoon na e lounge. No tin ningun otro area secreto. Ami tabata wardando riba mi casa mientras cu empleadonan tabata contando e caha caba y haciendo limpi. No tabata tin ningun fiesta priva.” Riba imagen di video, por a tuma nota cu pa 3:21 di mardruga, alomenos un 10 pa 15 persona tabata den e luga, e luznan tabata paga pero por mira nan ta baila y den ambiente entre 3’or pa 4’or di mardruga. Segun casa di e doño, nan ta enfatisa cu den e ora aki no tabata tin ningun cliente ni benta. Den un otro angulo, por mira cu tabata tin preparacion di bebida anto na banda e cahera por wordo mira ta contando e placa ainda. Pa 3:30 ainda por mira cu tabata tin contamento di placa, algun empleadonan tabata haciendo cos limpi anto den otro angulo pa 4:08 por mira entrada di Polis na e sitio. Autoridadnan concerni y abogado ta revisando imagennan di camara.
 
Escalacion
Den e grabacion di camara di seguridad, rond 4:09 di mardruga por mira unda polis a purba di aresta e doño anto e tabata nenga y pidiendo pa un motibo. Bon Dia Aruba a puntra si e confrontacion por a wordo evita, di cual casa di e doño ta bisa cu: “No a presenta cu ningun papel of autorisacion of motibo pa detencion. Nos no tabata haciendo nada malo dus nos no tabata sperando nada pa pasa. Direpente mi ta mira polis anto nan a cuminsa pone man riba nos.” Pa 4:10, por a mira oficialnan ainda intentando di detene un persona te cu otro empleadonan a purba di interveni anto akinan e situacion cuminsa escala. Pa 4:10 e luznan di e lounge a wordo cendi anto pa 4:11 por mira algun di e hendenan presente como tambe e oficialnan birando hopi fisico cu otro. 
 
Ningun politico como socio
Cuater persona a keda deteni anto un di esakinan a bay den libertad caba. Hopi detayes no ta conoci pero segun informacion di empleadonan, e persona mester a paga un multa anto el a bay den libertad sin problema anto sin yudansa di ningun minister manera cu tabata wordo comenta. “Nos no tin ningun politico como socio y nada di esaki tin di haber cu politica manera cu ta wordo comenta eyfo,” segun casa di e doño ta bisa. E dama ta sigui bisa cu: “Algo cu ta duel mi anto cu ta dunami berguensa pa hasta reacciona riba dje  ta cu den e luga aki nunca a tabata tin uzo di droga. Akinan nos ta bende cuminda, no droga.” Sra. De Suegar. “Mi casa a inverti un gran cantidad di placa pa mas bien duna un plus na e isla anto e unico cos cu e semper tabata kier ta traha anto inverti pa trece mas turista y aporta den cosnan bon na Aruba.” 

You May Also Like

ALP_9820 (Custom).JPG

Polis ta anuncia desviacion den trafico na Green Corridor

Relaciona cu trabounan di construccion tumando luga riba e caminda principal di Oranjestad pa ...

Reunion di Parlatino lo yuda pa traha concepto di ley riba legalisacion di cannabis

Parlamentarionan di Aruba a probecha e ocasion ultimo di Parlatino na Cuba pa asina ...

apertura festival buki mucha Br (7).jpg

Directora di biblioteca: “Laga nos bisa awe fiesta di buki ta cuminsa”

Diabierna Biblioteca Nacional Aruba (BNA) a celebra e apertura di nan 24 version di ...

Awe tardi partidonan MEP, POR y RED lo firma acuerdo di formacion

Awe mainta nos a wordo informa pa medio di un broadcast riba WhatsApp di ...

ValeroAruba.jpg

Trahadonan di Valero nan derecho y beneficio ta keda garantisa

Awor cu e negociacion entre Gobierno y Valero a termina y cu nos pais ...

MINISTERIO PUBLICO.JPG

Ministerio Publico ta aclara confusion riba articulonan confisca den caso Paul Croes

Den medionan di comunicacion, a start un confusion tocante e hecho cu supuestamente lo ...