Empleadonan di Selimar a mustra nan disgusto dilanti parlamento

Manifestacion di empleadonan di serlimar (2).jpg

Empleadonan di Serlimar a bay den welga ayera despues cu gobierno a anuncia cu lo cera e dump di Parkietenbos desde 1 di januari 2017.

Siman pasa gobierno a anuncia cu despues di a papia cu habitantenan di e area rond e dump, a dicidi cu lo stop procesamento di sushi na Parkietenbos y laga compania Ecotech cuminsa procesa sushi uzando nan sistema di gasificacion. Esaki a cay masha di sorpresa serca trahadornan di Serlimar, cu ta e compania estatal cu ta opera e dump na Parkietenbos. Ayera for di mainta e empeadonan na Parkietenbos a bay den welga, bloqueando entrada pa e dump. Despues nan a bay Bestuurskantoor na unda nan a vocifera nan malcontento.

Empleadonan ta puntra nan mes con por ta posibel  cu 1 di januari ta cera Parkietenbos, y tur truck di Serlimar tin cu bay Ecogas. Segun nan ta e placa cu nan ta genera den Parkietenbos ta percura pa e empleadonan di e compania por cobra fin di luna. Tin diferente cos cu nan ta rabia riba dje, entre otro cu gobierno a hinca empleadonan di e departamento di BoBario pa cay bou di Serlimar y wordo paga dor di nan. Tambe nan no tin claridad riba ken lo ta doño di e dump nobo cu lo bini na e refineria y kico lo pasa cu e trahadonan mirando cu nan no tin nada concreto firma pa gobierno. Trahadonan kier sa kico ta bay para cu nan y kico ta bay pasa cu Serlimar y kier un acuerdo firma preto riba blanco. Manera ta awo, ley ta stipula cu Serlimar ta e unico instancia cu por procesa sushi na Parkietenbos.

 

Reaccion di Edmundo Marlin di SEPPA:

Na dado momento sindicalista Edmundo Marlin a bay paden di Bestuurskantoor. Ora el a sali el a declara cu gobierno y SEPPA a yega na cierto puntonan. Na prome luga cu lo garantisa trabou y entrada pa e trahadonan. Gobierno ta para garantia pa situacion financiero stabiel di Serlimar. Traslado di e trabou di procesa sushi no lo wordo inicia tanten cu e posicion huridico di e trahado no ta bon. Marlin a sigui bisa cu Serlimar ta un compania cu lo sigui existi. Serlimar ta bay tin un aña di prueba  pa transporta sushi pa Ecogas. Ta bay bin insulators na unda Serlimar lo warda sushi pa procesa na Ecogas. Pa e prome ya caba a rosa un tereno gigantesco banda di Ecogas na Barcadera. Tur esnan envolvi ta na altura cu e situacion aki ta un problema grandi y lo tuma tempo pa yega na un solucion, segun Marlin. Aki no ta trata di solamente trahadonan na dump sino tambe personal cu ta recoge sushi. Segun Marlin, gobierno no a pensa si Ecogas por maneha e cantidad grandi di sushi cu Serlimar ta recoge pa dia. E sistema di kima sushi pa produci gas riba dje ta trece un holo desagradabel pa bisiña nan den cercania. Esaki segun Marlin lo ta contrario na Parkietenbos, na unda ta kima sushi pero biento ta manda e holo den direccion di lama. Gobierno no ta mustra e seriedad cu e caso aki merece y ainda no a bin cu un solucion definitivo, segun Marlin. Mientras tanto trahadornan di Serlimar a subi Facebook, declarando cu nan lo sigui tuma accion.

You May Also Like

simar

Maroeschka Cornelie, secretario di Simar: E aña aki tin cambio di directiva

Sindicato SIMAR ta inicia e aña cu diferente punto di agenda. Un di e ...

‘Gobierno mester ta transparente riba combersacion cu representantenan di Citgo/PDVSA’

Un delegacion di Citgo a yega Aruba pa atende cu gobierno (MEP-POR-RED)  e situacion ...

ahata.jpg

Ainda AHATA no a manda su candidatonan pa hunta di supervision di ATA

Te ainda e relacion entre AHATA y ministerio di Turismo no a wordo drecha; ...

BZ6I3235.jpg

Ulitmo Alteta Arubano elimina di Weganan Olimpico di Rio 2016

Aruba, 18 di augustus 2016. Diaranzon mainta e ultimo atleta di Aruba Monica Pimentel ...

Caida di confiansa di consumidor ta un ‘moment opname’ riba economia

Presidente di Camara di Comercio (KvK), Ernst Mohamed ta haya cu e caida di ...

Grupo di persona a presenta na Dimas awe mainta pa pidi status di refugiado

Ya for di oranan di trempan awe mainta, un grupo di persona a aglomera ...