(NLTimes) – Organisacion di bienestar di bestia Wakkerdier a anuncia e aña aki pa su premio anual Liar Liar Award (Premio pa Gañadonan).

Segun Wakker Dier, Van Dobben, e asociacion di cunukeronan hoben, PLUS, Jumbo y e sector di cabrito tur a haci declaracionnan falso tocante bienestar di bestia e aña aki.

Van Dobben ta bisa cu nan ta haci uso di “ingredientenan honesto” den nan paketenan. “E palabranan usa ta impactante mirando cu nan ta usa carni di bacanan cu ta ser haci gordo lo mas lihe cu ta posibel sin nan mama. Of nan tin ingrediente cu ta honestamente galiña cu ta biba den fabricanan unda cu tin demasiado galiña riba otro y cu ta cla pa traha kroket den 6 siman,” Wakker Dier a declara.

E asociacion di cunukeronan hoben di Hulanda a lansa un comercial unda cu a usa e lema “cunukeronan ta cuida bon di nan bacanan,” unda cu ta mira bacanan saludabel ta disfruta di hopi espacio y naturalesa. “Un pintura demasiado bunita,” Wakker Dier a bisa. “Un kwart di e bacanan nunca ta sali, y hopi di nan ta malo.”

PLUS a pone e lema di “orguyo di cunukero” riba nan carni, sinembargo no tin nada pa ta orguyoso di dje segun e comentarionan di Wakker Dier. E supermercado ta bisa cu e bestianan ta “cana liber” y “ta dicidi pa nan mes unda nan ta para, cana, sinta riba vloer, hunga of drumi.” Esaki por ta berdad. Sinembargo e ta tuma luga “den un area cera y den nan mesun excremento, cu solamente 1.8 meter cuadra di espacio pa cada un. E unico biaha cu e bacanan ta sali ta ora cu nan tin cu ser mata.”

Jumbo ta bisa riba nan sitio web cu nan tilapia ta crece den un ambiente unda “ta simula e comportamento natural lo mas cu ta posibel”, sinembargo nan ta crece den un densidad halto, di mas di 33 pisca pa cada meter cubico, den un riu cu tin hopi polucion, Wakker Dier a bisa. “Si nan sobrevivi e ‘condicion natural’ aki, hopi biaha nan ta ser mata sin sedante ni anestesia.”

Cu su premio annual Liar Liar, Wakker Dier kier trece un manera comico di hala atencion na e problemanan real cu tin den e sector di cuminda Hulandes unda cu ta trata e bienestar di bestianan. “E eleccion a comproba di ta efectivo, tur aña, algun di e candidatonan ta anuncia cu nan lo mehora nan producto of nan lo stop di usa expresionnna of lemanan cu no ta realmente aplica,” Wakker Dier a bisa.

Residentenan di Hulanda por vota pa nan ganjado faborito. Wakker Dier lo anuncia e ganador riba dia 6 di september.

LEAVE A REPLY

Please enter your comment!
Please enter your name here