(NLTimes) – Gabinete ta simpatisa cu e residentenan di Hulanda cu no por cubri nan gasto pa causa di e inflacion na Hulanda ademas di e prijsnan halto di energia, sinembargo nan ta mirando na e dunadornan di empleo pa solucionnan di termino corto.

E dunadornan di empleo mester aumenta e salarionan pa proteha e residentenan di Hulanda su pdoer di compra, varios Minister a comenta na NOS despues di un reunion diamars.

“Esaki ta temponan excepcional y ta yama pa medidanan excepcional tambe,” Minister Karien van Gennip di Sociale Zaken a declara. “Nos por resolve esaki solamente si nos traha hunto, cual ta inclui e dunadonan di empleo. Tin espacio pa aumenta salarionan.” El a reuni cu su coleganan di Economia y Finanzas riba diamars pa dialoga tocante e problematica di poder di compra.

Gobierno ya caba a haci apelacion na dunadonan di empleo pa aumenta salarionan, y e aumentonan actualmente ta na 3.5 porciento en averahe den juli. Sinembargo te ainda esaki ta bao e inflacion, cual ta na 10.3 porciento.

“Aki aya bo ta mira cu e salarionan ta aumentando, pero esaki no ta na mesun velocidad cu e aumento di prijsnan,” Van Gennip a bisa NOS. “Nos tin un problema sumamente grandi ora cu bo ta tende cu hende mester pone nan compras back pa motibo cu nan no por cumpra esaki.”

Minister Sigrid Kaag di Finanzas a duna e noticiero un declaracion similar. “Salario mas halto ta un solucion structural. No ta tur cos por bini for di gobierno,” el a splica.

E Ministernan no a categoricamente descarta cu e gobierno lo tuma accion pa e hogarnan di entrada baho y pa personanan cu entrada baho-medio. “Nos tur ta birando un poco mas pober, pero pa cierto gruponan, e consecuencianan ta enorme. Nos mester tira un bista na esaki,” Minister Mickey Adriaanses di Economische Zaken a expresa.

Van Gennip a urgi pa e personanan cu ta enfrentando dificultad financiero acudi na nan municipalidad of compania di energia pa ayudo of areglonan di pago. “Tin hopi posibilidadnan cu por yuda,” el a conseha.

Durante e siguiente dos simannan, Gabinete lo trata e presupuesto pa e proximo aña, cual lo ser presenta riba Dia di Presupuesto.

LEAVE A REPLY

Please enter your comment!
Please enter your name here