57 registracion pa REOI 1 y 44 registracion pa REOI 2

Ayera a wordo conoci e total di registracion di companianan cu a expresa nan interes tanto pa Request For Expression Of Interes (REOI) 1 y tambe pa REOI 2. Esaki despues cu dos luna pasa gobierno a inicia dos proceso pareu pa determina futuro di refineria pa medio di un destaho publico.

Cu presencia di director di Refineria di Aruba (RdA) Sr. Rennie Arends, Notario, Chamila Tromp, asisti pa su Compliance Officer Andrey Kelly, a duna conoce publicamente y na Ingles pa medio di social media, e resultado di e convocatorio aki. Pa medio di e proceso aki pais Aruba lo explora kende lo ta nan siguiente partner (nan) den e desaroyo di e sector economico aki. Un refineria cu a nifica hopi den historia economico di nos pais, pero cu ultimo tempo a confronta diferente retonan cu a haci cu ainda e ta cera y buscando perspectiva p’e.

Notario Tromp a informa cu e resultado di e primera lista di interesadonan di REOI 1 tabatin un total di 57 registracion. Di cual 38 di nan a cumpli debidamente cu nan Due Diligence y nan a manda nan documentonan cooperativo. Tambe di nan solamente 29 a manda nan Respondent Form contesta, loke ta nifica un 51% di e total di registronan.

Pa e di dos convocatorio of destaho di REOI 2, tabatin un lista total di 44 registracion. Un 34 di nan a completa nan Due Diligence y 25 di nan a manda nan respectivo Respondent Form contesta. Kiermen un 57% di e total di registracion. E proceso aki tabata uno full digital, pues ningun documento fisico a wordo entrega.

Varios di e interesadonan ta empresa estableci den nos region. Unabes cu a wordo conoci tur interesando pa ambos convocatorio, Sr. Arends a laga sa na Bon Dia Aruba cu un comision lo evalua cada un di e documentonan entrega door di e interesadonan. For di eynan RdA y su Advisory Committee lo traha un short list cu lo haya un invitacion pa haci un Binding Proposal.

El a laga sa cu awor cu e nombernan di e partidonan interesa a ser conoci, tanto RdA y su Advisory Committee lo tin un tarea dificil pa repasa y evalua tur y cada un di e registracion y documentonan y cada un basa den su meritonan. E proceso di evaluacion lo cuminsa inmediatamente.

Pues e ta un proceso cu ta tuma su tempo, y no tin un termino of fecha pa nan bin cla cu e trabao aki. Pero seguramente e no lo ta un proceso largo, mirando e necesidad y urgencia financiero cu pais Aruba tin pa atende tur nan compromisonan cu a bira mas grandi debi na e crisis di coronavirus. Unabes cu nan lo bin cla, director di RdA lo informa nos Prome Minister, Evelyn Wever-Croes riba e resultadonan preliminar.

Mirando e resultado final, ta sorprende cu e interes riba nos refineria ta mustra grandi. Pero mester evalua cuanto di nan berdaderamente ta companianan serio y solido y dispuesto pa asumi e compromiso aki cu pais Aruba.

E dos perspectiva aki a wordo determina pa exigencianan stipula door di RdA pa e REOI 1 y REOI 2. Riba e prome a pidi e interesadonan pa expresa nan interes den reapertura di refineria. Of tambe riba industrianan relaciona cu refineria y energia.

Riba e di dos of REOI 2, nan a habri posibilidad pa interesadonan expresa tambe nan interes den cualkier tipo di desaroyo industrial cu lo por bira un fuente di trabao y desaroyo economico similar na e refineria.