Manera Bon Dia a raporta, actualmente ta bezig ta test e incinerator na Parkietenbos sin un permiso pa esaki. Sinembargo di documentonan por a mira cu e proceso di destaho publico pa e incinerator a wordo uza pa beneficia Caribbean Trucking, mientras e compania Whooz Next ta cuidando esaki desde januari. Ademas, rapport di Serlimar ta indica cu tin candelanan spontaneo na dump.

Despues di a consulta documentonan cu ta disponibel na Directie Wetgeving en Juridische Zaken (DWJZ) den cuadro di Departamento di Obra Publico (DOW) su peticion pa permiso pa molester (hindervergunning) por a tuma nota cu nan a entrega e peticion aki 2 di juli 2020. Sinembargo di documentonan cu por a mira riba pagina di politico Ambrosio Candelario Wever, e compania Whooz Next Security ta cobrando desde (por lo menos) januari 2020 pa 1 extra security pa cuida e incinerator na Parkietenbos. E compania aki su doƱo ta casa di parlamentario Alan Howell (POR).

E peticion cu DOW a haci en realidad ta algo cu mester a tuma luga prome cu a instala, lanta of cambia e instalacion pa kimamento di (1) sludge di awa di riool na Parkietenbos, (2) desperdicio medico y (3) cadaver. Mirando cu e compania Whooz Next ya caba (por lo menos) di januari ta cobrando 10,909 florin extra pa luna pa cuida e incinerator, ta mustra cu bastante siguridad cu e mudamento of lantamento di e instalacion pa kima aki ta sumamente tarda y no a tuma luga segun ley, hancra den e hinderverordening. Sea ta posibel cu e pagonan aki ta fraudulento, of mester a pidi permiso hopi mas tempran. En todo caso actualmente ta haciendo testnan, sin cu tin permiso. Ya caba manera Bon Dia a trece dilanti, testmento ta posibel si ta solamente cende paga e mashin brevemente, y no pa operacion normal segun director di DWJZ.

Destaho regla

Asina mes ta remarcabel cu henter e proceso di destaho publico a padece di transparencia y no a bay segun normanan di bon gobernacion, asina parlamentario di VVD den Tweede Kamer a publica casi 2 luna pasa. Un di e prome aspectonan cu ta remarcabel ta e echo cu segun e parlamentario y e documentonan cu el a haya, (cual Bon Dia no tin den su posesion) Serlimar nunca a forma parti di e destaho publico pa e incinerator, pero si a determina despues cu nan lo forma parti di operacion. Esaki lo tabata necesario pasobra desde cu e destaho a cuminsa.

E time-line cu e parlamentario ta menciona ta cuminsa 19 di september 2018. Den un carta DOW-18/U2347 data riba e fecha menciona, DOW ta Indica cu e suma cu minister a reserva pa procesamento di desecho di riool, no ta cuadra cu e presupuesto spera. Ta mustra cu tabatin mas o menos 1.8 miyon presupuesta, mientras cu DOW ta indica cu gastonan lo por core te 4 miyon dollar, exclusivo otro gastonan. Tempo ey a haci varios peticion urgente na minister pa en bes di gasta e 1.8 miyon riba e kimamento di desperdicio, destina e placa pa restaura y sanea Bubaliplas y e otro plantanan di RWZI na Parkietenbos y Zeewijk. Den tempo ey tabata indica cu e plantanan mester atencion urgente, y cu hasta lo por conduci na un catastrofe si no mantene e plantanan. E tempo ey ya caba tabatin un contract cu Johnson’s Enterprises,ademas.

E destaho pa otorga e proyecto na Caribbean Trucking a conta cu varios otro compania, kendenan tur a indica cu no tabatin suficiente tempo pa reacciona riba e destaho, mirando cu a haci esaki den temporada hopi cortico.

Serlimar Fire Rapport

Den 2020, Serlimar a saca un rapport riba e candelanan spontaneo y bou superficie cu ta tumando luga na Serlimar. Echo ta cu na Serlimar, specialmente den cierto areanan di e dump, tin candelanan cu ta tuma luga spontaneamente y bou tera, mirando cu tin reaccionnan kimico bou tera pa via cu ta mescla tur e desperdicio.

Banda di esaki, durante cu nos reportero a bay mira e documentonan disponibel na DWJZ, hasta den e situatietekening di e instalacion, uzando un potret di satelite, ta mustra cu tin un candela den bastante cercania di e fuel tank, situa pafo di e edificio unda a instala e incinerator.

 

LEAVE A REPLY

Please enter your comment!
Please enter your name here