7 deteni di organisacion criminal traficando droga

Polis a detene 7 persona di un organisacion criminal traficando droga. Esaki a sosode diadomingo caba pero awor polis a manda un relato pa informa pueblo. E detencionnan a cay den cuadro di un investigacion andando pa basta tempo.

Durante e investigacion na e casnan na Rooi Afo, Sero Patrishi y Hooiberg Kavel, autoridadnan hudicial a topa cu un cantidad grandi di pakinan conteniendo marihuana y cocaina. Durante e investigacion na e cas situa na Hooiberg Kavel a haya hasta un arma di candela, un pistol cu dos peña yena cu bala cayente. Na e mesun cas, den baño a topa cu un saco di bruki cu yen di bala cayente uza den arma di candela. Husticia a tuma 3 auto y un boto estilo ‘Go Fast’ den beslag na dicho cas, den cuadro di e investigacion andando.

E sospechosonan deteni ta: e homber P.F. Hoyos-Gomez, naci na Colombia di 47 aña di edad, biba na Sero Patrishi; e homber C.D. Aguirre Henao, naci na Colombia di 30 aña di edad y biba na Paradijs;  e homber A. Aguirre Henao, naci na Colombia di 23 aña di edad y biba na Rooi Afo. Tambe a detene e señora L. Cadena-Garcia, naci na Colombia di 27 aña di edad y biba na Rooi Afo. Un otro señora D.C. Narvaez-Espinoza, naci na Colombia di 24 aña di edad y biba na Paradijs. Y finalmente a detene e homber C.D. Cardena-Garcia, naci na Colombia di 26 aña di edad y biba na Pos Chikito.

Despues di a descubri e cantidad di droga, arma y otro articulonan sospecha pa ta parti di un organisacion criminal, a sigui investiga y a conduci na detencion di e homber W.C. Everon, naci na Aruba di 61 aña di edad y biba na Tanki Leendert.