Te ainda e gobierno di Venezuela ta mantene di forma indefini y unilateral nan blokeo tanto aereo como maritimo riba Aruba y otro islanan di Reino Hulandes (Boneiro y Corsou).
Prome minister di Aruba, Evelyn Wever-Croes, a declara cu e no sa berdaderamente ki tin su tras riba e decision aki. A pesar di tur esfuersonan cu a wordo realisa na nivel di Reino Hulandes pa atende debidamente cu e contrabanda di mineral manera koper for di Venezuela pa nos islanan, gobierno di Venezuela ta mantene e blokeo riba e islanan ABC.
Sancion di Union Europeo
Ayera e mandatario a referi na e ultimo desaroyo cu tin na nivel di Union Europeo riba e situacion di Venezuela. Esaki ta un otro motibo cu a bin acerca riba e lista di aspectonan cu gobierno di Aruba ta kere cu tin tras di henter e asunto aki, y cu eventualmente ta hungando un rol pa gobierno Venezolano no a lanta e blokeo aki.
Ayera Union Europeo a dicidi di bin cu sancion contra shete funcionario di e gobierno di Venezuela. E ta haya cu a pesar cu Aruba no tin practicamente nada di bisa riba e decision aki, por ta Venezuela kier mescla un cu otro riba e embargo cu nan a bin riba e islanan di reino Hulandes y e sancion di Union Europeo. E mandatario a bisa cu “a nos no tin den nos man pa lanta sancion di Union Europeo.”
Segun nos prome minister e impasse cu a surgi di parti di e gobierno Venezuela riba e islanan ABC ta un asunto di relacion exterior di Hulanda. Den e caso aki, e ta un asunto di reino, caminda Aruba como pais no tin un espacio pa fiha su propio posicion cu ta bay contrario na esun di reino Hulandes. El a bisa cu su persona tin contacto cu minister di relacion exterior di Hulanda, Halbe Zeilstra kende ta esun cu tin cu encabesa e gestion aki cu Venezuela. Sinembargo el a bisa cu ora cu ta trata di interes di nos pais, ‘nos lo para duro pa nan’.
Lucha contra contrabanda
Considerando e argumento(nan) cu gobierno di Venezolano a bin cu ne pa hustifica e ceramento di su frontera pa nos islanan, a wordo traha un documento. E documento aki a wordo palabra cu e delegacion di Venezuela cu a bin reuni cu un delegacion di reino dia 12 di januari ultimo na Aruba. Pero te aworaki gobierno di Venezuela no a firma e documento aki cu ta compromete tur e partidonan envolvi pa combati e trafico ilegal entre otro di koper cu ta sali for di e pais bisiña aki.
Mirando cu aparentemente no tin mas argumento a pesar di e diferente factor cu eventualmente por a inspira e gobierno di Venezuela pa bin cu e tipo di blokeo aki, e mandatario no sa berdaderamente kico tin su tras pa gobierno di Venezuela sigui mantene su blokeo riba nos isla.
Sra. Wever-Croes dunando contesta na pregunta di prensa local, el a bisa cu e no sa kico ta e realidad di e mandatario Venezolano. Pero e ta conclui cu tras di nan mester tin algo diferente, ‘pasobra nos a atende cu tur e asuntonan cu tabatin nos dividi’. Pero te ainda e gobierno Venezolano no a firma e documento aki. Sinembargo esaki no ta kita cu Aruba ta sigui haci su parti pa combati cualkier cos ilegal rond di nos isla.
E blokeo aki no solamente ta afecta nos isla pa loke ta abastecemento di fruta y berdura na prijs mas barata, sino cu tambe ta afecta e cunukeronan y comerciantenan di estado Falcon cu semper a mantene un relacion comercial bilateral cu e islanan ABC.
Importacion rutanan y berduranan
Premier Wever-Croes a laga sa cu na niun momento a wordo prohibi pa e botonan cu ta trece berdura y fruta drenta nos isla. Sinembargo nan mester cumpli debidamente cu tur documento exigi pa nos autoridadnan local. “Nos na Aruba no ta prohibiendo importacion di e barconan cu ta bin cu nan papelnan na ordo. E echo ta cu nan no ta yegando pasobra Venezuela ta prohibi exportacion. E problema no ta na Aruba…”
