Amor pa naturalesa, sea pa matanan di flor of di fruta ta loke e ta sinti y tur dia ta percura pa mantene su cura bunita y yen di bida, manera el a sigura. Asina a expresa Carmen Tromp un persona pensionado cu a ricibi reportero di Bon Dia Aruba cu un sonrisa na su cas y a comparti un rato ameno pa conta cu for di basta añanan caba ora el a cumpra su cas e tabata kier un cura yen di naturalesa.

Añanan despues el a haci un ampliacion di su cas, a bin murayanan y e cura a cuminsa crece cu matanan pero algun di nan cu e tempo a muri y a haya malesa, “bo tin cu controla bo matanan pa nan no haya vruminga of yuwana, bo mester ta consciente di nan tambe”.

For di chikito Tromp y su famia a lanta cu mata y cunucu, awor door cu e ta un persona pensionado tur mainta cu e tin e tempo e ta bay den su cura pa asina wak kico ta bon y kico no pa e sa na unda e tin cu pone su atencion na unda el a menciona cu naturalesa ta duna alegria p’e.

Tromp a splica cu e ta pone vitamina pa su matanan, ademas di tera cu nan tin cu haya regulamente pa motibo cu tin matanan cu mester di mas atencion caminda cu e ta cumpra diferente hermentnan pa mantene nan, ademas di awa.

Den dianan aki door di yobidanan Tromp a afirma cu e ta coy awa di yobida den bakinan y usel’e pasobra awa na Aruba ta hopi caro, el a declara cu den un luna seco sin yobida e por gasta hasta 500 florin den awa so.

Un inversion di tempo y placa basta grandi a wordo haci manera el a menciona, pa motibo cu e ta cumpra su matanan pero ademas tin cu cumpra saconan di tera tur luna, pochinan y manera el a sigura “si mi ta wak un mata bunita of un pochi bunita mi ta cumpr’e, bo ta keda inverti den bo tereno y al fin cu tur cos cu bo ta haci den bida bo tin cu inverti pa haya felicidad y placer despues”.

Tromp tambe a conta cu el a bay diferente curso na unda el a haya informacion basico con pa cuida mata of ki tipo di mata ta bon pa planta na Aruba, asina mes el a declara cu el a haya otro personanan cu ta comparti informacion cu otro mediante rednan social, cu ta intercambia idea por ehemplo riba Facebook tin e grupo ‘Pasa tempo den cura’.

“Asina bo ta haya idea, ora mi ta saca mata mi ta publica riba Facebook pa wak ken ta interesa pa busca of tin hende cu ta trece tambe”, Tromp a bisa.

Un publicacion cu a hala atencion tabata uno na unda el a planta un mata di Pitaya of Dragon Fruit, Tromp a comenta cu pa prome biaha el a haya e fruta cu tabata cora pa den pero esey ta un di e diferente tipo di e fruta aki, tambe el a expresa cu el a haya cierto tips di con e mester cuida e planta pa por sigui haya mas fruta di dje.

Pitaya ta un di e fruta cu mas e tabata warda pa purb’e pa motibo cu manera el a indica, su prijs na supermercadonan ta hopi halto y door di esey el a dicidi pa cultiv’e pa asina ey e por haya e fruta den su mesun cas.

“Mi ta bay intercambia pa wak si mi ta haya e blanco e ora y e persona ta haya e cora” el a sigura.

Di e tipo di mata cu mas e ta gusta Tromp a bisa cu “mi ta gusta tur dos, mi ta gusta flor pa mira, fruta y berdura cu mi tambe tin como promenton of pampuna cu mi ta comparti cu mi famia”, el a afirma.

Tromp a bisa cu hopi hende tambe por purba di planta algo den nan cas, antes hopi hende tabatin hofi chikito den nan cas pero awor e tradicion ey a wordo perdi, pero asina mes desde cu pandemia di Covid-19 a haci presencia algun hendenan a dicidi di cuminsa planta den nan cura como hobby ora tabatin shelter in place.

Na Aruba tin algun tereno fertil cu Tromp a sigura cu hende no ta haci nada cune, “si por forma un sorto di cooperativo di bisiña y tur hende pone un tiki cen por haci uso di dje y por haya nan mesun productonan pa nan mes”.

Pa finalisa, por a mira cu casi henter su cura ta yen caba cu diferente tipo di matanan di fruta como mispel, sorsaca, macapruim, papaya, pitaya, coco y di berdura tin diferente promenton, pica, jalapeño, pampuna, entre otro.

LEAVE A REPLY

Please enter your comment!
Please enter your name here