(AP) – Carlo Ancelotti su prome dia como coach di Brazil a bisa “no” na Neymar y ta prominti di haya mas mehoracion for di su ex striker di Real Madrid Vinicius Junior.
Ancelotti a keda introduci dialuna na un conferencia di prensa na Rio de Janiero, y a keda ricibi pa brazil su 2 coach cu a gana Copa Mundial, 1994 su Carlos Alberto Parreira y 2002 su Luiz Felipe Scolari.
Scolari a duna ancelotti un jacket di e ekipo nacional y a bisa e prome stranhero den un siglo cu lo coach Brazil den tempo completo, “djis ta bo mes, ta e persona cu semper bo tabata y bo lo gana cu Brazil. Nos tur ta desea’bo exito cu Brazil ,semper nos lo sostene’bo.”
E Italiano, cu a haya contract te na fin di e Copa Mundial di 2026 na Merca, Canada y Mexico, a anuncia su prome ekipo pa e weganan di clasificacion proximo siman contra Ecuador y Paraguay.
Neymar a regresa Santos siman pasa for di un herida muscular y esaki tabata demasiado laat pa e coach nobo. “Desafortunadamente, nos tin hopi hungado cu a sufri lesionnan y no por forma parti di e ekipo nacional, manera Neymar,” Ancelotti a bisa. “Brazil tin hopi hungado talentoso, y den Neymar cu caso specifico nos ta contando riba su persona. El a regresa Brazil pa hunga y prepara pa e Copa Mundial. Mi a papia cune awe mainta pa splik’e y ta den acuerdo total.”
Ancelotti a bisa cu Vinicius lo crece bao su maneho. Vinicius a ricibi critica di fanaticonan di Brazil pa no reproduci su trabao den Real Madrid den e ekipo nacional. “Mi ta sumamente convenci cu Vinicius lo demostra su miho version den e ekipo nacional,” Ancelotti a bisa. Despues el a bisa den chiste, “manera Madrid. No esun di e aña aki, esun di aña pasa.”
Madrid no tabata mesun bon e temporada aki manera e temporada anterior, aliviando Ancelotti su decision di sali for di e club despues di 15 trofeo gana. Otro punto di dialogo tocante su ekipo di 25 homber ta e involucracion di Casemiro despues di casi 1 aña y mey. “E ekipo nacional mester di e hungadonan aki, ken tin carisma, personalidad y talento,” e coach a bisa. “Den futbol moderno, tambe bo mester tin entre otro compromiso y sacrificio. Y Casemiro tin esaki, varios di esnan den e ekipo tin esaki. Esey ta clave pa prepara pa e copa mundial.”
Cu un carera estelar incluyendo un record di 5 titulo di Champions League y titulonan nacional na Italia, Spaña, Francia, Inglatera y Alemania: “Despues di 40 aña, te ainda mi no sa kico ta logra e victoria pa ekiponan. Mi sa cu mi kier hungadonan confortabel riba veld.”
Tocante su plannan pa vakantie, el a bisa cu e “kier disfruta di e pais. Rio, mi no sa ainda. Nunca mi a bay Cristo Redentor.”
