(AFP) – Lider di oposicion Venezolano, Maria Corina Machado ayera a gradici gobierno di presidente Mericano, Donald Trump pa habri e “porta pa libertad” door di captura presidente Nicolas Maduro na januari.
E ganador di Premio Nobel di Paz a haci su comentarionan despues di bolbe Venezuela for di 10 luna di exilio. “Danki na nan vision, nan curashi y nan accion dia 3 di januari, e porta pa libertad a habri,” Machado a bisa durante un conferencia di prensa, nombrando Trump, su administracion, y Secretario di Estado Mericano, Marco Rubio.
E lider di oposicion ripitidamente a elogia e lider Mericano pa lansa e operacion riesgoso pa detene Maduro, y hasta a dun’e su medaya di premio Nobel – un premio cu pa hopi tempo Trump kier pa su mes.
Pero pa awo, Trump ta parce di preferi lider interino Delcy Rodriguez, ex-vice-presidente di Maduro kende a tuma over for di su hefe deroca.
Machado, kende a sali di su escondite na Venezuela december ultimo pa ricibi su Nobel, a bisa cu el a bolbe cas pa “mobilisa sociedad.”
Rubio “a inicia un secuencia di evento cu meta pa avansa un transicion democratico cu ta laga cla un eleccion presidencial na 2027.”
“Fecha di eleccion ta e fecha di liberacion,” el a agrega.
‘Mundo como testigo’
Machado tabata mas critico di e acuerdo masivo di petroleo entre Washington y Caracas, acorda anteriormente e aña aki, cu ta bay mira Venezuela entrega 20 porciento di su reserva amplio di petroleo na Merca.
“E acuerdo aki no ta refleha e nivelnan di transparencia cu sociedad Venezolano kier,” el a bisa.
E regreso di e lider di oposicion ta presenta un menasa pa e gobierno interino cu sosten di Merca, cu ripitidamente a priminti di tene eleccion sin pone un fecha.
Rodriguez a reitera e promesa, atrobe sin pone un fecha, diahuebs. “Ta bay tin eleccion… cu mundo como testigo,” Rodriguez a bisa tiki despues di conferencia di prensa di Machado.
Partido di Machado kier eleccion na 2027 y pa e ta permiti di postula, no manera e ultimo eleccion presidencial, tempo cu a prohibie como candidato.
Multitudnan a yega cuminda su motorcade, cu a biaha door di Venezuela na su regreso.
Rodriguez a expresa disgusto pa e fanaria. “Por a evita e show – e aeropuerto ta eynan mes,” el a bisa riba television estatal.
