Burgemeester di Utrecht y presidente di Vereniging van Nederlandse Gemeenten (VNG), Sharon Dijksma, a confirma cu tanto Gemeente Utrecht como VNG ta dispuesto pa brinda sosten tecnico na Aruba y otro islanan Caribense pa mehora maneho di desperdicio. Dijksma a haci e declaracion aki despues di un encuentro cu Prome Minister Mike Eman y su delegacion durante nan bishita di trabao na Hulanda.
Dijksma a cualifica e combersacion como positivo y a destaca e interes pa sigui cooperando cu Aruba den area di sostenibilidad, maneho di desperdicio y energia. E ultimo tempo Prome Minister Eman y su ekipo a sostene diferente reunion cu otro islanan den Reino y cu varios experto na Hulanda pa explora solucion pa e problematica di desperdicio. Tanto Utrecht como VNG ta interesa den e posibilidad pa Aruba desempeña un rol central den un modelo di cooperacion regional cu otro isla den Caribe Hulandes.
Maneho di desperdicio tin impacto directo riba calidad di bida
Dijksma a splica cu durante su bishitanan na e islanan Caribense, el a observa personalmente e impacto cu desperdicio benta rond ta causa den comunidadnan. Segun e burgemeester, mehoramento di maneho di desperdicio por trece un diferencia grandi pa habitantenan, specialmente den areanan unda acumulacion di sushi ta afecta e ambiente y calidad di bida. Dijksma ta considera cu cooperacion entre e islanan ta esencial, pasobra pa cierto solucionnan tecnico y procesamento di desperdicio ta necesario pa tin suficiente cantidad di material. Un sistema regional por yuda crea e escala necesario pa haci e operacionnan aki factibel.
VNG dispuesto pa brinda asistencia tecnico
Ademas di conocemento tocante procesamento di desperdicio, Dijksma a enfatisa cu VNG por brinda asistencia tecnico den organisacion y gobernacion di servicio publico. Como ehempel, el a menciona e experiencia di VNG cu Sint Maarten, unda e organisacion a brinda conseho tocante gobernacion y e responsabilidadnan necesario pa establece un sistema efectivo.
Un aspecto importante, segun Dijksma, ta con financia e servicio sin pone e carga financiero mas pisa riba famianan cu menos recurso. E burgemeester a destaca cu un sistema di maneho di desperdicio mester tene cuenta cu e responsabilidad di gobierno y habitante. Dijksma a confirma cu VNG tin e conocemento y experiencia necesario y ta dispuesto pa comparti esaki cu Aruba y otro isla pa yuda nan avansa den e proceso. E encuentro cu Prome Minister Eman ta un continuacion di e dialogo inicia durante e bishita di Dijksma na Aruba na mei di e aña aki.
Cu e disponibilidad di Utrecht y VNG pa brinda asistencia tecnico, Aruba tin oportunidad pa sigui explora un modelo regional di maneho di desperdicio, cu atencion pa sostenibilidad, eficiencia y bienestar di e habitantenan.
