Ayera mainta durante un conferencia di prensa presidente di Comerciantenan Uni Aruba (CUA) Sr. Frans Ponson a trece dilanti un preocupacion tocante e prijs di tereno y vivienda pa localnan na Aruba. Un preocupacion, segun el a indica, cu ta creciente entre miembronan di e organisacion.

Ponson a indica cu e situacion actual ta crea problema social den comunidad. El a splica cu durante temporada di pandemia di covid problemanan social bin dilanti pa motibo cu mester a cera hopi hende den nan cas. Aworaki no tin pandemia pero e situacion ta birando hopi serio.

El a sigui splica cu loke ta pasando aworaki ta cu entre e miembronan den CUA nan ta wak e preocupacion aki ta biniendo dilanti mas hopi. El a remarca cu door cu ciudadanonan no por yega na un cas, nan ta haya nan mes den e situacion cu nan mester biba na cas di mama cu tata, pero si e mama cu tata tin mas yiu, e yiunan ta biba cu e parehanan den e cas cu tambe y esaki ta trece problemanan social pasobra tur hende ta cera hunto den cas.

Ponson a enfatisa cu e punto principal cu CUA kier duna di compronde ta cu ta imposibel pa e na e momentonan aki un local yega na un cas of un tereno. “No mester splica tocante e topico, pero e ta imposibel. Si nos studiante ta bay Hulanda, ta haci un debe, nan mester bin Aruba paga un debe y yega na un tereno cu bono por paga. E casnan ta practicamente impagabel,” el a subraya.

Ponson a rectifica cu ora e referi na localnan, e ta referi na personanan cu ta biba, traha y contribui na economia di Aruba, sin importa nacionalidad.

El a agrega cu e topico aki, di prijsnan halto di vivienda ta uno cu ta pasando full rond mundo, no na Aruba so. El a remarca cu loke mester corda y e diferencia di Aruba cu otro paisnan ta cu na otro paisnan grandi, por ehempel Hulanda e hendenan por bay otro ciudad si e casnan ta mucho caro, nan por sali di e ciudad pa haya casnan na prijsnan mas barata. Pero na Aruba esey no ta un posibilidad.

“Na Merca ora un ciudad bira mucho caro bo por bay mas pafo. Hopi caminda por wak e problema aki, pero na Aruba ta asina chikito cu no tin caminda di move. Nos ta masha limita, no manera pais grandi cu tin miles di tereno cu nan por move y bay un caminda cu ta mas barata. Na Aruba no tin’e,” el a indica.

Ponson a enfatisa cu gobierno y gremionan mester sinta hunto pa bin cu un plan pa e problema di vivienda na e pais. El splica cu aworaki hopi vivienda ta bay ta pa stranheronan cu ta bin cumpra e casnan y e localnan e ora lo termina ta biba den “hokinan di dos pa tres” cu gobierno lo mester traha pa pueblo di Aruba na un luga pasobra e localnan no tin manera pa yega na un cas.

“Nos ta trece e preocupacion aki awe. FCCA, banconan, asociacionnan, gremionan, gobierno, tur mester sinta hunto y bin cu un plan pasobra e local no ta bay yega na un cas. Comerciante Uni no tin solucion. Cu nos ta bay tin un solucion aki un aña tampoco, pero si no pensa riba un solucion aworaki , aki 10 pa 15 aña mi ta garantisa nos tur ta biba den hokinan traha door di gobierno y nos no ta bay tin tereno,” el a agrega.

Pa loke ta trata tereno, Ponson a splica enfatisa cu tereno erfpacht ta tereno di gobierno cu tabata destina pa e pueblo biba aden. Gobierno ta regala e pueblo e tereno aki pa e biba aden, pero cualkier Arubiano cu tin un cas awe riba un tereno erfpacht por bende pa cualkier prijs, pero si e persona ta haya un stranhero ta cumpra e cas ey riba e tereno erfpacht na dos of tres biaha mas di loke e tabata pidi, logicamente e ta bende e cas na e stranhero.

El a subraya cu e no tin solucion pa esaki, pero ta importante pa sinta papia di e tema aki urgente pasobra si tur tereno erfpacht ser bendi cu hende stranhero y no atende cunele, no ta bay tin niun tereno mas pa localnan dentro di 10 pa 15 aña. “Nos terenonan ta limita. Tin un tiki tereno cu ta dunando na e pueblo, pero no ta un secreto cu no ta di e localnan mas,” el a agrega.

Ponson a splica cu e preocupacion aki a bin dilanti entre e miembronan di CUA, cu como bon dunador di trabou a tuma nota cu e topico a bira mas y mas popular entre e trahadonan.

“Awe mayoria doño di negoshi ta bisa bo cu tin hopi preocupacion den nan trahadonan cu nan no por yega na un cas, y si nan no por yega na un cas tin hopi tension y asina tampoco ta aporta mesun bon. Con nos ta bay regla e cos ki, atrobe esey nos no sa pero mi ta kere nos tin cu dun’e atencion y sinta cu tur gremionan y cu gobierno con nos por atende e cos ki na un miho manera,” el a señala.

No ta un secreto tampoco cu tin hopi cas rond di Aruba cu ta bandona y cu ta bay perdi pa motibo di problemanan entre famianan. Miembro di prensa a puntra si esaki ta algo cu por bin un solucion pe tambe pa asina no tin tanto tereno ni cas cu ta bay perdi mirando e necesidad cu tin pa tereno y cas entre localnan.

Ponson splica cu esaki ta un topico cu a bin dilanti caba tempo cu nan a papia di dje relaciona specificamente cu caya grandi cu tambe tin un cantidad di edificio bandona, pero gobierno nunca no a haci nada. “Atrobe mi ta bisa Comerciante Uni no tin e hermentnan pa tuma accion, pero gobierno si tin e hermentnan pa tuma accion y pueblo awor mester cuminsa trece esaki mas pa dilanti,” el a remarca.